Shillong, Iaiong 22 : Ki Pulit ka Jylla Meghalaya kila ioh ban kem ia u Nongialam ba hakhlieh ka kynhun kaikhlaw Kangleipak Communist Party (KCP)-People’s War Group (PWG)-kaba dei ka kynhun bala khein be-ain ka Jylla Manipur, na ka thain Byrnihat, Ri-Bhoi District.
Une u Nongialam ka KCP-PWG u kyrteng u Khundongbam Herojit Meitei bad la kem ia u da ka kynhun ki Pulit ka Ri-Bhoi District myn ha ka miet 21 tarik Iaiong por 8:30 baje eiei. Ia une u briew la kem na ka iingsah wai jong u kaba don ha 15 mile, Byrnihat.
U Superintendent of Police ka Ri-Bhoi Vivekananda Rathore ha ka sngi Ba-ar, ula pyntip ba une u nongialam kaikhlaw u dei uba donkti ha kiba bun ki kam pyntriem kum ka jingdawa pisa bad kiwei kiwei ha Jylla Meghalaya bad ha ki Jylla kiba marjan.
“Na ka met jong u, la ioh ban kurup ia artylli ki mobile phone bad kiwei kiwei ki kot ki slab a donkam. Ha ka jingtohkit, ula kubur ba u dei u dkhot ka KCP (PWG) bad u ju lum pisa na ka bynta kane ka kynhun kaikhlaw” ong u Rathore.
“Ka paw, ba ula wan rieh ha khappud ka Assam-Meghalaya ban lait na ka jingshah kem ha ki bor pahara kiba la pynlong ia ka jingkhynra kaba tyngeh ia ki kynhun kaikhlaw bapher bapher kiba donkti ha ki kam pyntriem ba pynthut ia ka shongsuk shongsain hapoh ka Jylla Manipur” ula ong.
U Vivekananda ula iathuh ba la suba jur ba une u nongialam ka KCP(PWG) u dei uba donkti ruh ha ka jingia suhbuit kam bymman bad ki kynhun kaikhlaw na Myanmar bad na Nepal,
Ula shah kem ha u snem bala leit noh ha Manipur namar ka jingdon ia ki tiar siat bad kumjuh ruh ha Dimapur ha u snem 2018 na ka kam khaii droks.
Ki Pulit kila register case pyrshah ia une u briew ha Nongpoh Police Station bad ka jingtohkit mynta kala iaid shakhmat.
-People’s War Group (PWG)-kaba dei ka kynhun bala khein be-ain ka Jylla Manipur, na ka thain Byrnihat, Ri-Bhoi District.){kind=link}