Yn tied ia ki baje ki Iingmane ha baroh ki Parish, yn pynlong ia ki Mass, baroh ki skul kin khang dam
Shillong, April 21: Haba ki riewngeit ka Balang ha ka pyrthei baroh kawei ki dap da ka jingsngewsih kthang halor ka jingkhlad noh jong u Pope Francis, hynne ka sngi Nyngkong u Archbishop ka Shillong u Most Rev. Victor Lyngdoh, ula pynmih ia ka kyndon jingbthah kaba dei ban bud ryntih ha kaba iadei bad ka jingleh sngewlem da baroh ki Parish bad ki jaka pule kiba hap hapoh ka jingkhmih jong ka Archdiocese ha ki sngi jong ka jingsngewsih ne Mourning Period.
Ha ka kyrwoh khubor, u Archbishop Most Rev Victor Lyngdoh ula kyntu ia baroh ki Father, Brother bad ki Sister ban batskhem ha ka rukom leh ha ka jingleh burom bad ia ka jingkynmaw burom ia u Kpa Bakhuid uba la khlad noh.
Mynta ka janmiet, baroh ki Parish kiba don hapoh jong ka Archdiocese la bthah ba kidei ban pynsawa ia ka baje iingmane kum ka dak burom ia u Pope Francis. Dei ban buh ia ka dur jong u Pope ha ki iingmane bad ki jaka pule, kum ka dak jong ka jingieid bad jingkynmaw.
U Archbishop ula bthah ruh ban pynlong ia ka Mass ha man la ki Parish bad ki jaka niam na ka bynta ka jingjahthait ka mynsiem jong u Pope, hynrei ula pynkynmaw pat ia ki nongsharai balang ba ha ‘Sede Vacante’ ne ka por ba ka shuki u Pope ka thylli, la weng noh shwa ia ka kyrteng jong u Pope na ka Jingduwai Iukharist bad la kdew tang ia ka kyrteng jong u Bishop jong kata ka jaka. Kane kan iai bteng haduh ban da jied bad thung ia u Pope bathymmai.
Nalor kane, ia ki jingduwai na ka bynta u Pope Francis dei ban kynthup ha ka jingduwai jong ki riewngeit ha ka Mass bad dei ban pynsangeh lut ia kino kino ki jingrakhe ne jinglehkmen ha ka por jong ka jingsngewsih kum ka dak jong ka jingburom.
Kum ka dak jong ka jingburom, baroh ki jaka pule jong ki Catholic kiba don hapoh jong ka Archdiocese kin khang khyrdep ha ka sngi ba on tep ia u Pope bad la bthah ia ki jaka pule ba kin pynmih ia ka jingpynbna halor kane.
Ban wanrah lang ia ki riewngeit baroh lyngba ka jingbuh jingduwai lang ne communal prayer, kumta yn pynlong ia ka Requiem Mass kaba kyrpang ha ka sngi baar ha ka por 5:30 janmiet ha Cathedral Church ha Shillong. U Archbishop ula khot la wer ia baroh ki nongsharai Balang bad ki riewngeit ban buh jingduwai na ka bynta ka jingjahthait ka mynsiem jong u Pope Francis.
