Imphal, Iaiong 21: Ki pulit ka jylla Manipur kila ioh ban kem ia phra ngut ki lehnoh kiba dei na ka kynhun Kangleipak Communist Party (People’s War Group) bad kila ioh ban pyllait im ia saw ngut ki briew ba kynthup ia lai ngut ki kynthei hapoh ka 24 kynta.
Hapoh ka 48 kynta, ki pulit kila ioh ban kem haduh 20 ngut ki lehnoh kiba dei na ki district bapher bapher bad ioh ruh ban kurup ia ki tiar siat bad ki kuli na ka met jong ki.
Hadien ka jingioh jingtip ba tikna, ki pulit bad ki bor pahara ha ka miet sngi u Blei kila khang kdong ia ka jaka rieh jong ki lehnoh ha Heirok kaba hap ha Thoubal bad da kaba suk kila ioh ban kem ia hynniew ngut ki snar kiba dei ki dkhot jong ka KCP (PWG).
Ha kane ka jingleit ban khang kdong, ki pulit kila ioh ban kurup shibun ki tiar siat ha ryngkat bad ki kuli na ka jaka rieh tngen ki lehnoh.
Ki tiar siat kiba la ioh ban kurup da ki pulit na ki lehnoh ki kynthup ia ar tylli ki suloi The INSAS rifles, kawei ka INSAS Light Machine Gun, kawei ka carbine, kawei ka MK-11 rifle, bad haduh 170 tylli ki kuli bapher bapher nalor ka radio handset, kawei ka kali ar shaka, kawei ka kali bad ki identity cards lem bad ki kot ki sla.
