Mairang, Nailur 1: U Deputy Commissioner ka Eastern West Khasi Hills Bah W Nongsiej ula kyntu ia ki Kynthei ba kin shim ia ka nuksa jong ka Phan Nonglait ban iakhun pyrshah ia ki kam thombor pyrshah ia ki Kynthei ha ka Jylla.
Une u Khliehduh ka District ba dang shu pynkha thymmai, ula kren ia kane ha ka jingrakhe ia ka Azadi Ka Amrit bala pynlong da ka North East Zone Cultural Centre (NEZCC), Dimapur bad ka Tnad Arts & Culture ka Jylla hynne ka sngi palei ha Nongrmai, Eastern West Khasi Hills District.
Ia kane ka jingrakhe bala pynlong halor ka mat pdeng “ “Ka Phan Nonglait”-Tribute to Unsung Heroes’, la pynshong kun da ki sur ieid ri, ki jingshad tynrai bad ka drama.
Ka shnong Nongrmai ka dei ka shnong, ha kaba la pun la kha bad la pynheh pynsan ïa ka riewshlur ïaleh laitluid ka ri, Ka Phan Nonglait.
U Deputy Commissioner haba kren kum u kongsan, ula kren halor ka histori jong ka jingim jong ka Phan Nonglait bad ki kam ba khraw ba kala leh ha ka jingialeh laitluid pyrshah ia ka sorkar Bilat.
U la pynpaw ruh halor ka jingshimkhia jong kane ka riewshlur pyrshah ia ka jingshah thombor jong ki kynthei khynnah bad u la kyntu ruh ïa baroh kiba la sakhi ïa kane ka prokram, ba kin ring jingmut na ki kam shlur jong Ka Phan Nonglait, da kaba pynneh pynsah ïa la ka riti dustur bad ban ieng pyrshah ruh ïa kino kino ki kam thombor pyrshah ïa ki riew kynthei.
Ha kane ka prokram la ïoh ban sakhi ïa ki jingrwai ieid ri bad ki jingshad tynrai na ki riew donsap bapher bapher ka Eastern West Khasi Hills District bad na kito kiba la wan na ka nongbah Shillong ruh kumjuh.
La pyniphuh iphieng bad pynshongkhia shuh shuh ïa kane ka prokram kynmaw burom ïa Ka Phan Nonglait, da ka drama halor ka jingim bad jingïakhun jong kane ka riewshlur ïaleh laitluid, da I Kong Lapdiang Syiem bad ka kynhun jong I.
Kiba la iadonlang ha kane ka prokram ki kynthup ia u Syiem ka Hima Nongkhlaw, u Pa’iem P.M Syiemlieh, u Myntri ka Hima Nongkhlaw, u Bah Boldness L Nongum, I Assistant Director ka tnat Arts & Culture Kong D. Kharjana nalor ki Ophisar ba kynthup ia u ‘riewsaid aiñ jong ka Ïing Bishar Ba Hakhlieh Duh ka Ri India u ba long ruh u nongthoh jong ka kot “Ka Phan Nonglait- A Lady Freedom Fighter of India”, u Bah Daniel Stone Lyngdoh Nonglait, bad kiwei kiwei.
