Shillong, Iaiong 21: Ka Sorkar Jylla kala bynshet ha ka All Party Committee (SPC) ba kan shong bishar ia ki kyndon jong ka Meghalaya Resident Safety & Security (Amendment) Bill, 2020, kaba la pynphai da ka Sorkar Pdeng.
U Symbud Myntri Rangbah Bah Prestone Tynsong ula ong “Ka Ministry of Home Affairs (MHA) kala pynphai ia ka MRRS (Amendment) Bill. Mynta ka song ha ngi ban pynbeit namar ka Sorkar Pdeng kala kren shai ba kane ka Ain kam dei ban ktah ia ka hok tynrai jong ki Nongshongshnong ka Ri India naba ka Jylla jong ngi ka dei ka lynti iaid sha kiwei pat ki Jylla”.
Ula bynrap “Ka Sorkar kan sa shong bad bishar bha ia kane ka kam bad nga kyrmen ba ngin lah ban wanrah da kawei pat ka lynti ban iada ia ki briew jong ngi haba pynthikna ia ka jingshngain jong ki”.
U Bah Prestone ula ong ba ia kane la kam la dep ban iakren ha ki kyrdan bapher bapher bad mynta ngin sa iakren ruh hapoh ka APC. Ula pynshai ba ia kane ka Committee la thaw ym tang ia ki seng sain pyrthei hynrei kan sa lum ia ki kynhun bapher bapher bad ki khlieh nongsynshar ban lah wanrah ia ki lad ki lynti ba lah ban leh eiei halor kane ka kam.
Ha u bnai Lber, ka seng HYC kala byrngem ia ka Sorkar Jylla ba ka lah ban pynlong ia ka jingiakhih lad aka Sorkar kam lah ban khot ia ka jingialang jong baroh ki kynhun ban iakren halor ka jinglong jingman jong kane ka Bill. Kane ka seng kala pynpaw ia ka jingbym sngewtynnad halor ka jingiaid suki ka Sorkar ban leh eiei haba iadei bad ka jingrung kyrthep ki briew ba nabar ka Jylla.
Ha ka shithi bala phah sha u Myntri Rangbah ka Jylla, ka HYC kala ong “La pyntip ruh sha ngi ba ka Sorkar Jylla hapoh ka jingialam jong phi, kan sa pynlong ia ka jingialang bad baroh ki kynhun ban iakren ia ki jingpynsngew jong ka Sorkar Pdeng bad ka lynti ban iaid shakhmat”.
 ba kan shong bishar ia ki kyndon jong ka Meghalaya Resident Safety & Security (Amendment) Bill, 2020, kaba la pynphai da ka Sorkar Pdeng.){kind=link}