Shillong, Iaiong 16: Ka Jaiñtia National Council (JNC) Western Zone hynne ka sngi Balang, kala phah tuklar ha u CEM ka JHADC Bah Thombor Shiwat daka ba kynnoh ba ki Bank kim ithuh iaki kot ki sla ba ai daka district council.
Ka dorkhas ba aiti sha u CEM ka kdew ba ka jingbym ithuh ki Bank iaki kot ki sla ba ioh napoh ka District Council ka buh jingeh iaki trai jaka bad ki nongshong shnong hapoh ka District.
Ka JNC ka kdew ba ka JHADC ba la ai bor da ka Sixth Schedule jong ka Riti Synshar ka ri India, ka ai ia ki kot ki sla kiba donkam kum ki kot bat khyndew lane Land Holding Certificates (L.H.C.), PATTA, No Objection Certificates (NOCs) bad Non-Encumbrance Certificates.
Hynrei ki Bank ki iai kyntait ne kim pdiang ïa kine ki kot ki sla, kaba kdew ba ki Bank kim khein kor iaka bor jong ka JHADC bad ka wanrah ki jyrwit jyrwat iaki trai jaka ban ioh ram naki Bank.
“Ka jingktah na kane ka jingbym ithuh ki Bank iaki kot ba ioh na ka Council ka buh jingeh iaki trai jaka ban ioh ram, ka buh jingeh haka liang ka pisa tyngka ban pynrung kyrteng ïa ki jaka ha u Registrar/Registering Officer. Kane kam buh jingkylli tang ïa ka jingioh bor ka JHADC hynrei ka buh jingeh ruh ban ioh long trai iaka khyndew ka shyiap daki kot ba ai ka JHADC” ong ka JNC ha ka kyrwoh.
Ka JNC ka la kyntu iaka ophis jong u CEM ban shim khia ban pynbeit ia kane ka kam.
“(Ngi) kyntu ïa ka ophis ban bthah ïa ki Bank ba kin ithuh bad pdiang ïa ki kot ki sla khyndew ba la ai da ka JHADC bad ban pyrkhat ban ai da ka certificate ba kyrpang ban pynsuk ha ka ban ai jingithuh” la ong ka kyrwoh.
Ka JNC ka ban jur ba kino kino ki Bank kiba leh bym ithuh ia ki kot ki sla ba la pynmih da ka JHADC ki dei ban long kiba la khreh ban mad ia ki jingeh.
Ka seng kala kam ba naka liang u CEM u la pynthikna ban shimkhia ia kane ka kam.
 Western Zone hynne ka sngi Balang, kala phah tuklar ha u CEM ka JHADC Bah Thombor Shiwat daka ba kynnoh ba ki Bank kim ithuh iaki kot ki sla ba ai daka district council.){kind=link}