Gangtok, Iaiong 12 : Ka Meghalaya kala ioh ia ka nam champion jong ka 2nd NECDC Senior Women’s Interstate Tournament hadien ka jingpynliem ia ka Sikkim da 2 wicket ha ka jingiakhun ba long hynne ka sngi Saitjain ha Sikkim Cricket Ground.
Haba beh ia ka thong ba 115 runs, ka Meghalaya kala lah ban kamai ia kane ka run tang hapoh 19.3 over, ka jingiaroh ka leit sha ka thei iatied ba 10 ka Riticia B Nongbet, kaba la tied ia ka boundary ban jop syndon ia ka jingiakhun.
Hashuwa kane, ka Sikkim hadien ba ka jied ban tied nyngkong, kala lah ban kamai tang 25 runs bad hap shi wicket hapoh ka 10 over ba nyngkong. Hynrei ka Priyanka Kurmi kaba la tied 43 ryns bad ka Preetika Chettri ba tied 29 runs, kala lah ban pynpoi ia ka thong ba 114 runs ha ki 20 over.
Ki nongkawang bol ka Meghalaya kila lehkai bha khamtam ka Captain Debasmita Dutta bad ka Monica Singh kiba la ioh ban shim mar shi wicket, katba arngut pat kila hap wicket da kaba run out.
Haba beh ia ka thong, ka Meghalaya kala duh lkloi ia ka nongtied ba nyngkong ka Luiza Tamang hynrei ka jingialehkai paralok ba 72 run hapdeng ka Captain Debasmita kaba kamai 35 run bad ka wicket keeper Monica Lyngdoh Phawa ba tied 37 runs, kala lah ban buh ia ka Meghalaya ha ka lynti sha ka jingjp.
Ka Monica kaba la ioh lai tylli ki boundary bad kawei ka six tang hapoh ka 28 bol, kala shah jied kum ka Player of the Match.
Ka Megalaya kala ioh wanrah sha iing ia ka trophy, ka Primula Chettri jong ka Sikkim kala shah jied kum ka Player of the Tournament bad ioh ruh ia ka khusnam ba shim bun eh ki wicket da 9 wicket ha ki saw tylli ki jingiakhun. Ka paralok jong ka Samayita Roy Pradesh kala pyndep kum ka nongkamai runs ba bun eh ha ka lympung da ka jingioh 139 runs.
Ia kane ka jingiakhun phainal la pynshongkyn da u MLA bad Advisor ka Tnad Bording ka Sorkar Sikkim Sanjeet Kharel kum u kongsan. Kiwei pat kiba la shah khot sngewbha ki kynthup ia Linda Palmo Bhutia, Commandant, Sikkim Armed Police; former MLAs Timothy William Basnett bad Am Prasad Sharma; Rayonald Kharkamni, Honorary Secretary, Meghalaya Cricket Association; Shankar Newar, MCA Coach bad member; Amita G. Thapa, Secretary, Tennis Ball Cricket Association of Sikkim; bad Sailesh Rai, HR Head, Aristo Pharmaceuticals.
