Shillong, Iaiong 11 : Ka Iingkashari Meghalaya High Court kala bthah ia u Special Judge (CBI) ba un pynjlan shuwa ia ka jingshong bishar ia ki sakhi ba iadei bad ka jyrsieh thungkam nonghikai u snem 2009 haduh ka por kaba u shim ba ka long kaba biang ban pynlah ha kaban bishar pyndep ia ka aplikeshon kaba pan ban pyndam noh ia ka jingbishar kam bymman (criminal proceeding).
Ka Iingkashari kaba khlieh da u Chief Justice IP Mukerji ha ka hukum ba pynmih ha ka sngi Thohdieng kala ong “Kane ka Iingkashari kam shym la pynsangeh ia ka jingtian bishar hynrei ka shu kyrpad ia u Special Judge (CBI) ha Shillong ba un pynjlan shuwa ia ka jingbishar ia ki sakhi haduh kata ka por ka ba u sngewbit ban pynlah ia kane ka Iingkashari ba kan pyndep ia ka jingbishar ia ka aplikeshon ba sahteng bad ban pynmih ia ka hukum”.
Ka Nongshah kynnoh hapoh ka kyndon 482 jong ka Criminal Procedure Code, kala pan bor ban pynduh pyndam noh ia ka jingbishar kam bymman bala tian bishar nalor kiwei kiwei, ka Myntri tnad Ain, ka nongshah kynnoh ha ka jyrsieh thungkam nonghikai.
“Kane ka Iingkashari kala sdang shong bishar ia kane ka aplikeshon. Lada kane ka aplikeshon ka poi sha kaba jop, kan mut ba ka dei ka jingkut jong ka jingtian bishar. Hynrei lada kam jop, ka jingtian bishar ka lah ban bteng. Ha ka jingiohi jong nga, kam don jingmut ban nang pynbteng ia ka jingtian bishar ha kane ka por hashuwa ban pynwai noh ia kane ka aplikeshon kat kum ka kyndon 482” ong ka Iingkashari.
U Salman Khurshid, Senior Advocate ba mihkhmat ia ka nongshah kynnoh ha ka kyndon 482 CrPC, la bthah ba un iai bteng ia ka jingiasaid ia ka aplikeshon hapoh ka kyndon 482. U Khurshid ula bteng ia ka jingiasaid hynrei u khlem lah pat ban pynkut ia ka.
“Buh ia kine ki kam ban bishar biang ha ka 7 bad 8 tarik Jymmang, 2025 ha ka por 12:30 baje janmiet lane hadien ba dep shong bishar lut ia ki mukotduma jong ka Division Bench, kat kaba kloi” bthah ka Iingkashari.
