Shillong, Iaiong 08 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar kan sa iasyllok bad ki kynhun bapher bapher halor ka jingdonkam ban pynduh noh ia ka jingdon bun jait ki skul hapoh ka Jylla.
“Ka dei kaba kwah eh (ban don noh tang katto katne jait ki skul) namar ngi iohi ia ki jingmyntoi ha ka hynrei ka dei kaba bun jnit bun jnat bha ha kajuh ka por namar man ki jait skul ki don la ki jong ki jingeh” ong u Conrad haba iakren bad ki nongthoh khubor.
Ka Jylla Meghalaya ka don haduh 14540 tylli ki skul kiba kynthup ia ki skul Sorkar, ki skul shimet, ki skul SSA, ki skul Deficit bad ki skul Adhoc.
“Mynta, ban wanrah lang ia baroh hapoh kajuh ka Board lane kajuh ka jait, kane ka donkam ia ngi ban iasyllok sani bha bad ki nonghikai, ki managing committee, ki kynhun bapher bapher bad kumta ngi don ia ka jingthmu bad ngi la iasyllok bad ki briew” ula ong haba pynshai “Ta ka daw balei ba shibun ki shithi la phah sha ki college, ki skul, kine hadien ba ioh ia ka shithi, ka jingsngewkhia ioh ka Sorkar ka shim ia ki sienjam ba tyngeh kala mih hynrei kam long kumta. Ngi shu pyrshang ban sngewthuh ia ka jinglong jingman, ki jyrwit jyrwat naba khlem ka jingsngewthuh ngin ym lah ban jam shakhmat”.
Haba pynpaw ba ka jingpynkoit ia ka jingeh ka dang iaid shakhmat, u CM ula ong “Ngi dang pyrshang ban sngewthuh ia ka jingeh bad hooid, ka dei kaba ngi kwah eh ba ngin don noh tang khyndiat jait ki skul namar kan kham suk ban pynbeit ia ka rukom treikam bad pyniaid ia ki hynrei kumba nga ong, kam long kaba suk, ka donkam ban hap iasyllok bha bad ki kynhun bapher bapher”.
“Ka lah ban shimpor hynrei ngi hap ban sdang ia ka jingiasyllok ban tip kumno ngin lah jam shakhmat” ula bynrap.
Ka kylla kaba lai la ai jingbatai da ka Tnad Education halor ki jingeh ba mad da ka Tnad ha ka jingialang jong ka Kynhun Myntri ba long hynne ka sngi.
“Ka kam pule dangle ka dei kaba mat ba jyrwit jyrwat bha ym tang ha ka pule ka dangle hynrei ka jingbun jait palat ki skul. Ngi hap ban law iaki sohkyrdot baroh hynrei ngi hap ban leh ha kata ka rukom ba kan nym pynthut than ia ka rukom treikam. Ka dei kaba jyrwit jyrwat bha hynrei ngi dang pyrshang ban leh eiei ia ka” ong u Myntri Rangbah.
U Conrad ula ong ba dei kine ki jingeh kiba la ktah ia ka PGI index ranking ne ka kyrdan ha ka PGI Index jong ka Jylla.
