Imphal, Nailur 01: Ha kawei na ki jingjop kaba khraw, ki shipai ka Assam Rifles kila ioh ban kem noh ia arngut ki ehrang kiba dei na la ki jong ki kynhun seng lehnoh ka Manipur na Imphal district bad na ka sor rit Thoubal.
Katkum u heh pulit la iathuh ba ka kynhun na ka tnat Keithelmanbi Battalion ka Assam Riffles ha ryngkat ki bor pulit ka Manipur kila ioh ban kem noh ia kine ki arngut ha la ki jong ki jngkhynra ha kane ka sngi ba Ar ba la lah.Kine ki arngut ki ehrang ki dei na ka kynhun United National Liberation Front- Progressive (UNLF-P) bad ka People’s Liberation Army (PLA).
Ha kawei pat ka jingleit khynra, ka Longding Battalion ka Assam Rifles ha ryngkat ki bor pulit ka jylla kila ioh ban kem noh ia u dkhot jong ka kynhun ENNG na ki bynta jong ka Zibo colony hajan ka nongbah.
Hadien ba la ioh ia ka jingtip kaba bniah halor ka jingdon ki dkhot jong ka ENNG ha ki jaka paidbah ha Zibo colony jong ka sor rit Longding, kumta ki shipai ka Assam Rifles ha ryngkat ki pulit ka jylla kila pynlong ka jingkhynra kaba jur ha katei ka jaka bad ioh ban kem noh ia utei u dkhot ka ENNG.
Ha ka jingtohkit la shem ba une u dkhot u dei u ba donkti ha kaba pynshlur ia ki khynnah samla ba kin pyniasoh ia lade bad kane ka kynhun ENNG.Ka jingshah kem noh ki dkhot kiba treikam bha kala wanrah ka jingduh kaba khraw na ka bynta ki kynhun seng lehnoh kiba treikam ha kane ka thain.Ia une u dkhot la aiti noh sha ki bor pulit ka Longding na ka bynta ban pynlong shuh shuh ia ka jingtohkit.
