Shillong, Nailar 31 : Hadien ka jingshna bad maramot mynta kumba 2(ar) bnai ei ei, ka Tourism Promoters Trekking Society, Wahkhen ka la rai ban plie biang ia ka lynti iaid kjat lyngba ki jingkieng siej (bamboo trekking route) ban poi sha u Mawryngkhang uba don ha shnong Wahkhen naduh ka 10 tarik Nailur 2022 ter ter.
Katei ka jaka jngohkai ka ju khring ia ki nongjngohkai pyrthei na kylleng ki jylla ka ri India bad kumjuh ruh na kiwei ki ri ka pyrthei ban wan jngoh kai bad peitkai ia utei u mawbah mawsan uba la ju tip ruh kum u syiem jong ki mawbah mawsan naduh hyndai hynthai.
Halor kane ka Society ka kyrpad ruh ia baroh ki nongwan peitkai ba kin long kiba sngewthuh ban nym pynjaboh pathar ia ka Mei Mariang, ki dei ban kiar na ka jingbret pathar ia ki plastik bad ban kiar ban pynlong ia katei ka jaka kum ka jaka iadih kyiad ne jaka bret bad pynpait bitor namar ka ktah ia ka jinglong ba kyrpang jong katei ka jaka.
La kyntu ruh ia ki nongwankai ba ki dei ban bat ia ka akor ka burom khlem da thadlad ne pynjah burom ia lade. La kyntu ruh ia baroh kiba kwah ban wankai sha katei ka jaka ba kin ai ka jingiatrei lang khnang ban khring bad pynkiew shuh shuh ia katei ka bamboo trekking spot ha ki snem kiban wan.
