Nongpoh, Nailar 30: Saw tylli ki Shnong ba hap ha Block II ki la phah ia ka dorkhas sha u Myntri Rangbah ka Jylla Conrad Kongkal Sangma ba dawa ia une u Nongialam ka Jylla ban pynthikna ba kine ki Shnong ki dei ban don ha ka map jong ka Jylla Meghalaya ha ka jingiapynbeit pud jong ka wat kaba ar.
Kine ki saw tylli ki Shnong ki dei ka Shnong Mawlen, Mawlen-2, Umshatri bad ka Shnong Pantalu, kiba hap hapoh ka jing khmih jong ka Raid Nongtung.
Kat kum ka dorkhas, kine ki Shnong kila pyntip ba kine ki Shnong ki dei kiba shongshong da ki Khasi Khara bad baroh ki nongshongshnong kim pat satia ba ha ka jingiapynbeit pud ka Sorkar Meghalaya bad Assam, kine ki shnong kin leit sha ka Jylla Assam.
Ia kane ka dorkhas bala soi da u Rangbah Shnong ka Mawlen Bah Edrolin Saring, Rangbah Shnong ka Mawlen-2 Bah Linshon Mukhim, Rangbah Shnong ka Umshatri Bah Phrian Khymdeit bad Rangbah Shnong ka Pantalu Bah Browel Khymdeit, la aiti ruh sha ka seng Khasi Students Union (KSU) ha ka jngiakynduh hynne ka sngi, haba kyrpad ruh ia kane ka seng ki samla pule ba kan iakren lem bad ka Sorkar Jylla ban pynhap ia kine ki saw shnong ha Jylla Meghalaya.
Kine ki Nongialam Shnong kila shong jingialang bad ki Nongialam ka KSU-North Khasi Hills bala ialam da u President samla Ferdinald Kharkamni ban iasyllok halor kane ka kam.
U President ka KSU-North Khasi Hills ula pyntip ba ka Seng kan sa pynpoi ia ka dorkhas jong kine ki saw shnong sha u Myntri Rangbah ka Jylla.
Kat kum ka jingong jong u, kine ki saw shnong ki dei kiba shong shnong da ki Khasi bad ki dei kiba din ka hok ban hap sha Jylla Meghalaya.
“Ka Seng kan sa kyrpad ruh ia ka Karbi Students Association ba kam dei ban tuklar ne pynwit namar kitei ki shnong ki hap ha ka West Karbi Anglong kaba dang shu mih thymmai“ ula ong.
Ha kajuh ka por, ula dawa ia u Myntri Rangbah ka Jylla ba u dei ban shimkhia ia kane ka jingdawa ki saw shnong bad ba dei ruh ban pynthikna ba ki 18 tylli ki shnong ha Block-II ki dei ban don noh ha Meghalaya ym ban leit sha Assam. “Ngi tip shai ba kine ki Shnong kim kwah satia ban leit sha ka Jylla Assam” ula ong.
