Shillong, Iaiong 01 : U Myntri ka Tnad Excise Bah Kyrmen Shylla ha ka sngi Ba-ar, u pyntip ba ka Tnad kala pynsangeh shipor ban ai licence thymmai ban plie wine store bad bonded warehouse kat bym pat pyntrei ia ka lynti ba thymmai ban pynbeit ryntih ia ka rukom ai licence.
Haba kren sha ki nongthoh khubor, u Bah Kyrmen ula ong “Ngi la pynsangeh ban ai licence ia mynta shipor. Ngin sa wanrah ia ka lynti treikam ba thymmai. Ngin sa sda gban ai licence tad hadien bala pynlong ia ka jingwad bniah kaba sani bha”.
“Ki kam jong ngi kila don ha ka kam. Ngi la pynlong ia ka jingwad bniah ba thikna ban tip ba hangno ngi donkam ban pynbun ia ki wineshop bad hangno ba ngi donkam ban sangeh noh” ula bynrap.
Kat kum ka jingong jong u, ia kane ka rai la shim hadien ka jingioh pdiang ia ki jingujor na ki trai wine shop ba kim ju lah die bha shuh ia ka kyiad namar ka jingdon bun palat ki dukan kyiad.
“Halor kane ka jingujor, ngi la pynsangeh ban ai licence thymmai. Ngin wad bniah shuwa bad hadien ngin sa iaid shakhmat ban ai licence thymmai. Lada ngi shem ba ki dukan kyiad ki duna bha ha kino kino ki jaka hynrei ka jingdie ka bun, ngi kwah ban ai licence hynrei ngim lah ban shu ai beit beit satang lada ki don lut ia ki kot ki sla kiba donkam” ula ong.
Halor ki dukan kyiad ba don marjan ki jaka pule bad jaka mane Blei, u Myntri ula ong ba ka Tnad kan sakhmih ia kane ka kam hynrei ym shym la don satia ki licence thymmai bala ai.
U ong ba ia ki licence la ai haba pynshong nongrim na ka NoC bala ai da ki Rangbah Shnong.
“Ngi ju burom ia ka jingsngew u paidbah bad u Rangbah Shnong u dei u briew, uba tip khambha iala ka jong ka shnong bad ula shah jied da ki paidbah jong ka Shnong. Kumta, ngi sngew b aka long kaba donkam ban shim ia ka jingbit jong u khnang ba hadien habud lada ki kam ki long pyrshah lane u paidbah u pyrshah, ngi lah ban iakren bad ki Rangbah Shnong” ula ong.
