Nongpoh, Iaiong 01 : Ka Confederation of Ri-Bhoi People (CoRP) kala pynpaw ia ka jingpyrshah kaba jur halor ka jingkynnoh thied jaka sopsop ka Meghalaya Industrial Development Corporation (MIDC) ha ki thain Umsiang.
Kane ka Seng kala dawa ruh ia ka Sorkar Jylla ba kan pynsangeh noh mardor ia kane ka jingthied jaka ha ka thain.
Haba kren sha ki nongthoh khubor, u Working President ka CoRP Bah Pateng Myrsing ula pyntip ba ka MIDC kala thied ia ka jaka ba 300 akar tam ha ka thain bad ka dor kala kot jin palat klur tyngka. U kynnoh ba ia kane ka jaka la shu thied tang da ka jingtip ki Rangbah Shnong bad u Syiem ym ki paidbah.
Ula kynnoh ba ka jingphaikhmat ka MIDC sha ka thain Umsiang ka dei hadien ba pulom ka jingthmu ban pynkylla Industrial Estate ia ka jaka jong ka Soil & Water Conservation, Byrnihat na ka daw ka jingpyrshah ki padbah.
U Bah Myrsing ula ong ba ka jingdon ki karkhana ha Byrnihat bad Umiam, kim shym la ai jingmyntoi satia ia ki trai muluk hynrei ka kyntiew pynban ia ki bar jylla bad kaei kaba kane ka thain ka ioh pat, ka dei tang ka jingjakhlia bad ka jingrung kyrthep ki bar jylla.
“Namar kata, ka Seng kan ieng pyrshah beit halor ka jingthied jaka jong ka MIDC ha Umsiang bad shen kan sa sei paidbah ia ka kaiphod ba kan sa ioh lyngba ka RTI bala pan na ki bor ka MIDC” ula ong.
Ula ong ba lada ka Sorkar kam leh eiei halor kane ka kam, ka seng kam banse ban mih madan bad pynlong ia ka jingiakhih.
 kala pynpaw ia ka jingpyrshah kaba jur halor ka jingkynnoh thied jaka sopsop ka Meghalaya Industrial Development Corporation (MIDC) ha ki thain Umsiang.){kind=link}