Shillong, Jylliew 14: U Nongialam ka BJP bad Myntri barim ka Sorkar Jylla Bah A.L.Hek ula buh jingkylli halor ka jingmih jong ka kynhun “High Level”, ia kaba la kynnoh ba ka dei kaba pyniaid ia ka Sorkar Jylla khamtam ha ka jingshim ia ki rai kiba kongsan hapoh ka Jylla.
“Baroh kila iakren ba kumno ia baroh ki rai jong ka Sorkar la shim da ka kynhun “High Level”. Phin hap ban wad ki leh aiu kita ki High Level bad mano ba don ha kane ka kynhun” ong u Bah Hek haba iakren bad ki nongthoh khubor hynne ka sngi ba-ar haba kylli halor ki jingkynnoh bamsap pyrshah ia ka Sorkar Meghalaya Democratic Alliance (MDA) ba ialam da ka National Peoples Party (NPP).
U Bah Hek ula bynrap “ La ki dei ki nongdie sha, ki nongshong dukan madan, ki Ophisar Sorkar, ki Nongtrei Sorkar ne ki Nongkhaii dewiong, nongkhaii mawshun, baroh ki iakren beit tang shaphang kita ki kynhun “High Level”. Balei ba ym kylli ia kne ka kynhun ba kumno ki pyntreikam ia ki skhim bapher bapher hapoh ka Jylla”.
Haba kylli, une u MLA ka Pynthorumkhrah ula ong ba baroh ki kam laleh kat kum ka rai jong ka kynhun High Level bad bynrap “To ngin kylli na kane ka High Level namar nga hi ngam lah ban iathuh namar ngam don lang ha kane ka High Level”.
“Ka kynhun High Level ka dei ka khana ba iakren mynta ha kylleng ki jaka bad ki paidbah ki dei ban tip mano ba don bynta ha kane ka High Level” ula ban jur.
Watla une u Myntri barim ula kyntai ban batai bniah halor ka jingtreikam kane ka kynhun, hynrei ula ong da kaba shai kdar ba kiei kiei baroh ki dei ki kam “be-aiñ’ suda.
“Ia baroh ki rai la shim da kane ka kynhun High Level la ka dei ka jingpyntreikam ia ki skhim, ki kam ba manla ka sngi kiba jia ha Jylla bad kiwei kiwei” ula ong haba bynrap “Ka Jylla ka ju don ia ki High Level Committee ne ki High Power Committee hynrei deiban wad tynraila kane ka kynhun High Level ka dei kajuh ne kumno”.
Ha kajuh ka por, u Bah Hek ula pynpaw ia ka jingsngewkhia halor ka jingmih ki khyrdop lum khajna kum ki tit kiba be-aiñ ha ki surok National Highway.
“Wat ki briew kiba don ha ka Sorkar kila iathuh ba ki don shibun ki khyrdop ba pynieng be-aiñ mynta ha ki National Highway” ula ong bad bynrap “Ym tang ka Congress, hynrei lada phi kylli ia ka BJP, UDP ne kino kino ki Party, kin sa iathuh ia phi ia ka jingmih bun tylli ki khyrdop be-aiñ hapoh ka Jylla mynta”.
U Bah Hek ula maham ba kino kino kiba donkti ha ki kam bamsap kin sa shah ktah jur ha ka elekshon MLA ban long ha u snem 2023 ha Jylla. “Ngam shym kren tang ia ki Party hynrei ia ki shimet ruh kumjuh”ula ong.
