New Delhi: Kum ka jingïaleh ban pynpawnam shuh shuh sa ia kiwei de ki jingïalehkai Sports, ka sorkar pdeng lyngba ka tnad Civil Aviation ha ka sngi ba ar, kala pynbna ïa ka National Air Sports Policy lane ka NASP 2022 lane ka rukom pyntreikam ïa ki jingïalehkai Sports kiba ju ïalehkai ha suiñ.
Ïa mynta ka NASP, kan treikam ia ki jingïalehkai sports kum ka , aeromodelling, model rocketry, amateur-built bad experimental aircraft. Nangta ka ballooning, drones, gliding bad powered gliding, ka hang-gliding bad powered hang-gliding, parachuting kynthup ia ka skydiving, BASE jumping bad wingsuit flying), paragliding bad paramotoring, powered aircraft bad rotorcraft.
U Myntri ka tnad Civil Aviation, u Jyotiraditya Scindia, u la ong ba ki Samla kidei ka lawei jong ka jingïalehkai Sports suiñ ha ri India bad na ka liang ka sorkar kan pynshlur ïa ki ba kin ïashim bynta ha kine ki jingïalehkai bad yn peit ruh ban pynrung kum ka jingpule ha ki skul ne College.
Ka Air Sports Federation of India (ASFI) kan dei ka bor ba hakhlieh duh na ka bynta ki jingïalehkai sports ha suiñ. “Ka ASFI kan pynmih ïa ki kyndon hapoh hynriew bnai naduh ba la pynmih ïa ka NASP 2022 hadien ka jingïapynbiet bad ki kynhun bapher bapher kiba pynïaid ïa ki jingïalehkai sports suiñ”, la ong u Scindia. Ïa ka ASFI yn khlieh da u Secretary ka Civil Aviation, u Rajiv Bansal.
“Ka ASFI kan dei ka bor ba hakhlieh duh bad kan mih khmat ia ka India ha ka Fédération Aéronautique Internationale (FAI) bad kiwei kiwei pat ki bor pynîaid ïa ka Air Sports”, la ong ka khubor na ka Ministry of Civil Aviation da kaba bynrap ba kiwei pat ki tnad treikam ne ki seng jong ki jingïalehkai sports suiñ kin hap hapoh ka ASFI bad kin ai jingkheiñ ïa ka jingtreikam jong ki sha ka.
Ha kajuh ka por u Scindia, u la pynpaw ruh ba kane ka jingïalehkai sports ha suiñ kadei kawei ka lad ban kyntiew ïa kaïoh ka kot ha India bad kan long kawei na ki karkhana ban aikam aijam ïa ki briew.
