Shillong, Lber 27 : U Myntri Rangbah ka jylla u Conrad K Sangma ha ka sngi Thohdieng u la bthah ban pynsangeh noh ïa baroh ki kam ha u mot sah nam (Cenotaph) jong ka thma bah ba nyngkong bad u la pynthikna ban thaw ïa ka Committee hapoh shi taiew ban ïakren bniah ïa kane ka mat.
Ia kane ka jinguklar la ai sha ka kynhun jong ki seng bhalang (CSO) kiba don hapoh ka Joint NGOs Forum of Garo Hills, kiba pyrshah ia ka jingpynpra dang shen ia u mot jong ka thma bah ba nyngkong, ha ka jingialang ba long ha iing sah jong u ha Tura, West Garo Hills District.
Ka kyrwoh ba la pynmih da ki sengbhalang ka la ong ba hadien ka jingïamir jingmut kaba bniah, u Myntri Rangbah u la pynthikna ïa ka kynhun ba yn sa shim ïa ki sienjam ban pynbeit mardor ia kane ka kam.
“U (CM) u la pynthikna ba baroh ki kam ha une u mot yn pynsangeh noh haduh ban da pynbna da kumwei pat bad u la kular ban thaw ïa ka Committee kaba thymmai, kaba leh hok, bad kaba kynthup lang ia baroh hapoh shi taiew ban ïakren bniah ïa kane ka kam. Kane ka Committee, u klar ba kan kynthup ia ki Sengbhalang, ki Historian, ki Nongialam ka thain bad ki Dkhot jong ki Shnong ba shah ktah ban pynthikna ba kino kino ki kamban shim hadien halor ki kam ha une u mot kan long kaba shai bad ba mynjur lang,” ka la ong.
Haba pdiang sngewbha ïa ka jingkular jong u CM, ka Joint NGOs Forum pynban ka la ong ba watla ka jingpynjot ka la dep ban jia, ka rai ban thaw ïa ka Committee kaba thymmai ka long ka jingkyrmen ban ai ïa ka hok bad pynbeit. Ka forum ka la pynpaw biang ruh ba dei ban pynbahklieh ïa kiba donkti ha ka jingpynpra khlem jingbit bad dei ban pyntreikam ïa ki lad ki lynti kiba skhem ban ïada na kum kine ki jingjia ha ki por ban wan.
Ka jingialang ka la long ka sienjam kaba kongsan ban weng ia ka jingbym sngewhun jong ki paidbah kaba nang kiew halor ka jingbym don ka jingshai ha ka rukom synshar bad ka jingsngewthuh ia ka kolshor ha kaba pyniaid ia ki mat kiba iadei bad ka pateng tynrai.
 jong ka thma bah ba nyngkong bad u la pynthikna ban thaw ïa ka Committee hapoh shi taiew ban ïakren bniah ïa kane ka mat.){kind=link}