Nongpoh, Lber 23 : Kawei ka Longkmie kala iap ka jingshah syllad ha kawei ka trok katba ka dang thmu ban jam sha shiliang jong ka surok hajan ka shnong Mawdiangum, Ri-Bhoi District.
Kane ka Longkmie ba mad ia kane ka apot ka dei kaba tip kyrteng kum ka kong Sotlibon Ingti ba 57 snem ka rta, kaba shong ba sah ha ka shnong Umta, Ri-Bhoi.
Kat kum ka khubor Pulit, kane ka jingjiakala jia ha ka janmiet sngi Saitjain ha ka por 6 baje eiei. Ka trok kaba ioh tynrah ia kane ka longkmie ka dei kaba don u nombor NL01-AC-4395.
Ki paidbah kiba iohi ia kane ka jingjia, mar mar kila pynkit ia kane ka longkmie sha Nongpoh Civil Hospital hashuwa ban poi ki Pulit hynrei namar ka jingmynsaw kaba jur,kane ka longkmie kala khlad noh hapoh hospital.
