Nongpoh, Lber 23 : Ki Pulit ka Ri-Bhoi District, ha ka sngi U Blei, kila dain kuna da ki lak tyngka na ki nongniah kali, kiba pynkhein ia ka ain Motor Vehicle Act.
Ki Pulit ka Ri-Bhoi na ka por sha ka por, kila maham tyngeh ia ki nongniah kali ba pynkhein ain, namar ka jingnang kiew ki jingjia ba sngewsih ha ka surok bah NH-6 na ki jingjia aksiden, kiba mih na ka jingniah kali hapdeng ka jingshoh khaw-iang, ka jingniah kali khlem da pyndait iaki seat belt, ka jingniah kali khlem akor/pynher sted bad kiwei kiwei.
Manla ka sngi U Blei, ka NH-6 ha Ri-Bhoi District khamtam ha Umsning By-Pass, ka ju kylla long ka jaka iastunt (pyni sap niah ba khyllah) jong ki kynhun bapher bapher khamtam ki nongniah kali arshaka bad kiwei kiwei. Kane kala pynbor ia ki Pulit ban peitngor bha bad ban shim ia ka sienjam kaba tyngeh.
Hynnin ka sngi Saitjain, ki Pulit ka Umsning Police Outpost, kila pynlong ia ka jingpeitngor ha surok Umsning Bypass bad kila ioh ban bat ia bun tylli ki kali kiba pynkhein ain. Ki Pulit ka Umsning kila ioh lum ia ka kuna kaba kot haduh T. 54,000 kaba kynthup ia T.22,000 ka pisa bad T.32,500 kaba iaid lyngba ka challan.
Ha Nongpoh, ki Pulit ka Nongpoh Traffic Branch kila ioh lum T.11,500 da ka pisa bad T.40,000 da ka challan.
Ki Pulit ka Ri-Bhoi District kila rai ban pynbteng man ka por ia kane ka jingpeit pyrman ia ka rukom niah kali bad thuk thik hapoh ka District.
