Itanagar, Lber 21 : U Symbud Myntri Rangbah ka Arunachal Pradesh Chowna Mein ula ban jur ia ka jingkongsan jong ka Upper Siang Multipurpose Project ha ka jingleit jurip ia ka Upper Siang District ha ka sngi Palei.
U Mein ula pynpaw ia ka jingsngewkhia halor ka Hydro project ba $ 137 billion jong ka China hapoh ka Wah Yarlung Tsangpo, kaba la khmih lynti ban pynmih bording haduh 60,000 MW.
“Kane ka project ba heh bha jong ka China kan sa ktah jur ia ka wah Siang bad pynduna ia ka jingwan tuid ka um, ka ban buh ha ka jingma ia ki jingthaw ba im ha ka wah bad ktah ruh ia ki million ki briew ha Assam bad Bangladesh kiba shaniah ha ka wah Brahmaputra ha ka rep ka riang bad ka kamai jakpoh” ong u Mein.
U Symbud Myntri Rangbah ula ong ruh ba ka Upper Siang Multipurpose Project ka lah ban tem ia ka plan jong ka China ban shna ia ka dam kaba heh.
U Mein ula kren shai ba ka jingthmu ba hakhmat eh jong ka project ka long ban tehlakam ia ka jingshlei um bad ka jing pynjulor ia ka mariang, ym tang ia ka jingpynmih bording.
“Ha ka por ba rkhiang ka bneng, ka dam kan iarap ban pyllait ia ka um slap na u pud u sam ka India, ban pynthikna ba ka wah Siang kan ym ring tyrkhong. Lada jia ba pyllait um kynsan kynsan na ka dam ka China, ka project kan tehlakam ia ka jingwan tuid ka um ban khanglad ia ka jingshlei um ba shyrkhei sha ki jaka them” ula ong.
Ula kyntu ia ki briew kiba la nang la stad jong ka thain ba kin pynsngewthuh lem ia ki paidbah halor ki jingmyntoi jong kane ka project.
U Mein ula kyntu ruh ia ki briew ba pyrshah ia ka project ba kin wan sha kajingiakren haba kular ba ka Sorkar kan nym shim rai satia khlem da ioh ia ka jingmynjur lang.
