Agartala, Nailar 31 : Tang shi sngi hadien ba u national president ka BJP, u JP Nadda ula pynkut ia ka jingwan jngoh ba ar sngi ia ka Tripura, ki party liang pyrshah ka jylla kila kynthoh tyngeh ia u Nadda halor ki jingkam ki jong u halor ki kam pynroi ha Tripura.
Ka liang pyrshah Congress bad ka CPI-M ha Tripura kila ther tyngeh ia une u president ka BJP u NP Nadda da kaba ong kane ka party kala shukor ia ki paidbah ka Tripura lyngba ki jingkam ki bym shisha.
U JP Nadda ha ka sngi Nyngkong ba la lah ula kam ba ki jingkular jong ka seng BJP shwa ka ilekshon assembly ha u 2018 la dep ban pynurlong, bad ki kam pyntriem sain hima sima kila duh la dam syndon ha ka jylla ha kine ki saw snem shiteng kiba la dep.
U nongialam ba la rim ka seng Congress uba dei ruh u MLA, u Sudip Roy Barman ula ong ka long kaba sniewbok shibun na ka bynta u nongialam ba hakhliehduh kum u JP Nadda ba un pynmih ia kiba kum kine ki jingkam ki bym don nongrim.
Ula ong ruh ba ki paidbah ka Tripura mynta kila sngewthuh halor ki kam thok kam shukor jong ka BJP tang ban shu pynbiej ia ki paidbah.
“Ka Tripura ka dei ka jylla kaba wan hakhmat eh halor ki kam thombor sain hima. Ki briew kiba kyrshan ia ki party liang pyrshah ki ngat ha ki jingshah pynshitom bein, ki iing ki sem jong ki, ki ngat ha ki jingshah pynjulor, ki dkhot ki longiing ki shah thombor bad ki jingdon jingem ki shah pynjulor,” ong u MLA ka Congress, u Sudip Roy Barman.
Ula ong ruh : “Kila don haduh kumba 5000 tylli ki jingjia ha kaba ki kynhun runar ba la kyrshan da ka BJP kila thombor ia ki nongtrei, ki nongkyrshan, ki nongialam bad wat ia ki MLA jong ki liang pyrshah, kata kaba kynthup ia nga.”
U Barman ula kynnoh shuh shuh ia ka BJP halor ka jingpyndonkam ia ki rukom treikam lyngba ki kam iaumsnam bad ki kam thombor sain hima, ia kiba la sdang pyntreikam da ki nongsynshar communist.
“Ki kynhun riew pyntriem, ki nongdih drok bad ki briew kiba bamsap kila kylla long ki dkhot jong ka seng BJP.La thung ia ki na ka bynta ban thaw ia ka kynhun runar kiba niah da ki thuk thuk,” ong utei u nongialam ka Congress.
“Ki kam pyntriem pyrshah ia ki kynthei ha Tripura kila kiew syndet naduh ka jingsynshar jong ka BJP.Ki kam synshar khadar kila khyllem noh namar ka jingbym shimkhia jong ki bor pulit.Mynta ym don ba shngain ha Tripura namar ka sorkar BJP kala pyniaid da ka jingsynshar jong ki kynhun runar,” ong shuh shuh u Barman.
Nalor kata ula ong ruh ba lada u JP Nadda u sngew ba kane ka dei ka jingsynshar kaba khuid, Nga dei ban kyntu ia u ba un pynbeit mardor shwa ban ngat ha ka jingkhih bitar jong ki paidbah.
Ha kawei pat ka bynta, na ka liang ka CPI-M ha Tripura ruh kala kynthoh tyngeh halor katei ka jingkam jong utei u president ka BJP u JP Nadda.
Na ka liang u secretary ka CPI-M ka Tripura, u Jitendra Chowdhury ula ong ba ka jingiaroh u Nadda ia ka sorkar bala lamkhmat da ka BJP ha Tripura ka dei ka jingpynshlur na ka bynta ban pynduh pyndam ia ka synshar paidbah.
“Haduh kumba shihajar ngut ki briew kila shah pynngat ha ki jingkynnoh kam beain, ki nongpathai khubor kila shah pynngat ha ki kam ialeh pyrshah ri hapoh ka jingsynshar jong ka BJP ha Tripura, kata namar ki jingkynthoh pyrshah sorkar lyngba ki social media,” ong u Chowdhury.
