Dhaka, Nailar 31: Ka kynhun ba la lamkhmat da u Dr. Naba Kumar Das kum u convener ka Joint Movement Committee for Corridor, kila aiti ia ka dorkhas sha ka Myntri Rangbahduh (PM) ka Bangladesh, ka Sheik Hasina ha ka 29 tarik mynta u bnai ba kyntu ban shim ia ki sienjam ha ka ban pyniaid shakhmat ia ka jingthmu ban shna lynti rel bad surok hapdeng ka India-Bangla na Hili, West Bengal sha Mahendraganj, Meghalaya lyngba ki jaka puta jong ka Bangladesh.
Ia kane kajuh dorkhas la aiti ruh sha u Myntri ki kam pyniaid rel ka Bangladesh, u Md Nurul Islam Sujan ha ka sngi kaba bud ha ka jingiadon lang u Ekbal Rahim, u Chief Whip ka parliament ka Bangladesh, u Amulya Ratan Biswas, Rupak Dutta, Subrata Majumdar Dollar, General Secretary, Dinajpur Press Club, ki nongmihkhmat na ka NTV, Hili, Shahinur Reza bad ka Wahedujjaman Bulbul bad ka advocate ka iingbishar Supreme Court ka Bangladesh.
Na ka liang u Dr. N. K. Das ula pynpaw sha ki lad pathai khubor da kaba ong ba ia kane ka projek lynti rel bad surok hapdeng kine ki artylli ki ri ba marjan ka dei ka mat kaba la dawa la slem bha da ki nongshong shnong jong kine ki artylli ki ri, bad ba ka jingpyntreikam ia kane ka projek ka ban sah kynmaw ha ka histori kan kyntiew ha ka liang ka ioh ka kot bad halor ka jingiadei kaban jan hapdeng ka India bad ka Bangladesh.
