Pynliem ka India ia ka Maldives da 3-0 kol ha ka International Friendly
Shillong Lber 19: Ka khana pateng kan kynmaw ia ka Shillong kum ka jaka kaba u nongialehkai ba pawnam ka Ri India, Sunil Chhetri, ula wanphai biang ban ialehkai na ka bynta ka Ri bad ban ioh thep ia ka kol kaba 95 na ka bynta ka Ri.
Ka jingialehkai ha ka sngi Balang pyrshah ia ka Maldives ka dei ka jingialehkai International Football ba nyngkong eh ka ban long ha JN Stadium, Shillong.
Mar ia sdang kane ka jingiakhun, ki paidbah kila risa ban sakhi ia kane ka jingialehkai football bad ka jingrisa kala nang sawa jam man ba u Sunil Chhetri u ioh rah ia ka bol bad ki nongpeitkai kila lehkmen hab u Chhetri ula ioh thep ia ka kol ha ka minit kaba 76.
Ka kynhun ialehkai jong ka ri India kala pynrem da 3-0 ia ka Maldives ha ka jingiakhun ia ka International Football Friendly kaba la long ha JN Stadium, Shillong hapdeng ka jingwan sakhi jong palat 6000 ngut ki nongpeitkai.
Ha kane ka jingiakhun naduh ba sdang ka kylla step, ka ri India kala ialehkai bha bad kala ioh ia ki katto katne ki kabu kiba biang hynrei kam shym la lah satia ban thep kol, hynrei dei ha ka minit kaba 34 ba u Rahul Bheke ula ioh thep ia ka kol na ka bynta ka India. Ka Maldives kala ialeh bna rah ia ka bol shakhmat ban thaw ia ki lad ban ioh thep kol hynrei kam shym la iohlad satia na ka jingkhlain jong ki rang ialehkai ka India.
Ha ka jingiakhun ha ka kylla miet ruh ki nongialehkai ka India kila bteng ban ialehkai bha bad kila tur beit shakhmat ban ioh thep kol hynrei kila pynlehnoh ei ia ki kabu kiba kila ioh.
U Liston Colaco ula thep ia ka kol ka baar na ka bynta ka India ha ka minit kaba 66 bad tang hadien 10 minit u Kapten ka ri India u Sunil Chhetri ula thep ia ka kol ha ka minit kaba 76 bad kane kadei ka kol kaba nyngkong eh ka jongu bay n ioh thep hadien ba ula wanphai biang ban ialehaki na ka bynta ka ri India.
Kane ka jingioh thep 3 kol ka ri India kala pynjem khnap syndon ia ki nongialehkai ka ri Maldives.
Ka India mynta kan pynkhreh ban iakhun pyrshah ia ka ri Bangladesh ha ka AFC Asian Cup Qualifier kaban long ha ka 25 tarik u Lber ha JN Stadium, Shillong.
Katba ka ri Maldives kan iakhun pyrshah ia ka Phillipines ha ka AFC Asian Cup Qualifier kaban long ha ka 25 tarik u Lber hapoh ri Maldives.
