Shillong, Lber 18: U nongïalam ka BJP bad Myntri Sorkar Bah AL Hek u la ong ba ka jingthmu ban wanrah ïa ki projek lynti rel ha ka Ri-lum Khasi bad Jaiñtia ka dei ban long katkum ka mon jong ki paidbah.
Haba kren sha ki lad pathai khubor halor ka mat lynti Rel, u Bah Hek u la ong “Ka shong ha ka jingjied jong ki paidbah lada ki paidbah ki kwah ban don ka lynti rel, ka lynti rel ka dei ban wan bad lada ki paidbah kim kwah ia ka lynti rel ( ka lynti Rel kam dei ban wan). Ka shong ha ka jingjied jong ki paidbah”.
Kane ka jingkren u Bah Hek ka long kum ka jubab halor ka jingpyrshah kaba jur jong ki sengbhalang ïa ka jingthmu jong ka sorkar ban wanrah lynti rel ha East Jaiñtia Hills District.
Haba kylli, u bah Hek u la ong, “Nga ong ia phi kane ka dei ka jingmyntoi jong ka jylla Meghalaya ym jong ka party. Ngi kwah ban iohi tang na ka bynta ka jingmyntoi jong ki paidbah ka Meghalaya.”
Haba iadei bad ka jingbym lah ka BJP ban jop haki ilekshon District Council, u nongialam ka Meghalaya BJP u la ong ba kadei ka jingjied jong ki paidbah.
“Ngi la buh la ki jong ki kyrtong hynrei kim lah ban pynlong namar ka dei ka jingjied jong ki paidbah kumno ngin tip la ki briew ki la thep vote ne kim thep ia ka party ngam lah ban ong eiei ka dei ka jingjied jong ki” u la ong.
