Nongpoh, Lber 18: Ban iada na ki jingjia ba sngewsih tang na ka daw ka jingthang khlaw pathar khamtam ha kane ka aiom tyrkhong bad jur lyer, u District Magistrate ka Ri Bhoi District u la pynjari syndon da ka kyndon 163 BNSS kaban treikam ha baroh ka district.
Haba kren bad ki Nongthoh Khubor, u Abhilash Baranwal, DM ka Ri Bhoi District, u la pyntip ba u hap ban pynjari da kane ka kyndon ain namar ka jingiai ioh khubor halor ki jingpluh jong ki khlaw ki btap ha kine ki sngi ha kiba bun ki bynta jong ka district kaba la buh jingma shikatdei ia ki jingim briew, ki nongkynti, ki mrad khlaw bad kaba ktah ruh ia ka mei mariang.
U la iathuh ruh, ba la bthah ia ki ar tylli ki tnad sorkar ba kynthup ia ka DFO Social Forestry bad ka Soil and Water Conservation ban khmih bniah ia ka jingthang khlaw pathar bad ruh ban bthah ia ki nongialam shnong ban pynbna sha ki paidbah ban kiar na ka jingthang khlaw pathar.
Ula kyrpad ia ki nongialam shnong ba kin khmih bniah ioh don kano kano ka jingthang khlaw khlem da don jingtip jong ka shnong bad la kyntu ba kin pyntip sha ki bor ka ain khnang ba kan lah pat ban shim ia ki sienjam ba donkam. Ula maham tyngeh ia kito kiba pynkhein ia kane ka kyndon ain ba kin ngat ha ka jingshah pynshitom kaba tyngeh.
Na ka liang ka ophis u Superintendent of Police, Ri Bhoi District, ka la pynmih ia ka jingkyrpad sha ki paidbah ban kiar na ka jingthang khlaw pathar bad ruh ban ia treilang bad ki bor ka ain ban iada na kino kino ki jingjia ba sngewsih.
