Sdang biang ka jingtih dewiong ha Jylla | Ot ribon u CM ia ka Scientific Mining Coal Block ba nyngkong ha Saryngkham

Khliehriat, Lber 17 : Ka Khathynniew tarik Lber kan dei ka sngi sah khana ha ka histori ka Jylla Meghalaya namar ha kane ka sngi, ka jingtih dewiong da ki kor saian (scientific mining) kala sdang hapoh ka Jylla ban pynkut noh shisyndon ia ka jingtih dewiong thliew khnai kaba la shah khang pyrshah ha ka NGT la palat 10 snem.

Kane ka jingtih dewiong da ki kor saian kala sdang ha Saryngkham-A’ Coal Mine, Byndihati, East Jaintia Hills District ka ban dei ruh ka Scientific Mining Coal Block ba nyngkong eh ha Jylla. La plie ia kane ka jingtih dewiong da u Myntri Rangbah ka Jylla Conrad K Sangma lyngba ka video conferencing.

Ha kane ka prokram la iadonlang u Myntri Sorkar Bah Kyrmen Shylla, ka MLA ka Sutnga-Saipung Kong Santa Mary Shylla, u Executive Member ka Jaintia Hills Autonomous District Council (JHADC) Bah Hambertus Nongtdu, u Deputy Commissioner ka East Jaintia Hills District Shivansh Awasthi, u Superintendent of Police ka district Giri Prasad, kiba shah khot sngewbha bad ki paidbah ka thain.

Haba ai jingkren, u Conrad K Sangma ula ai khublei ia baroh kiba don bynta lang ha ka kam kynthup ia ki ophisar, ki trai par, kiba aplai ia ka lease, u trai jong katei ka par dewiong Bah Dapmain Shylla na Byndihati, kiba la noh synniang ha ka ban lah sdang ia ka scientific mining ha ka jylla.

“Kine ki 10-11 snem bala leit noh ki dei ki snem kiba buh ha ka jingeh kaba khraw ia kiba bun ki nongshong shnong jong ka jylla khamtam eh ia kito kiba don bynta bad ka kam tih dewiong, kiba la iakynduh diengpynkiang ha ka kamai kajih ka jong ki” ong u Conrad.

U Myntri Rangbah ula pynkynmaw ba ha u snem 2018 haba ula shimti kum u Myntri Rangbah ka jylla ha ka sien kaba nyngkong eh, ka kam tih dewiong ka dei ka mat kaba la buh hakhmat eh da ka sorkar jong u bad lyngba ka jingtrei shitom ha kine ki 6-7 snem kiba la dep, mynta kine ki jingpyrshang baroh kala seisoh lyngba ka jingsdang ia ka Scientific Mining Coal Block kaba nyngkong ha Meghalaya.

“Ka jingiaid lynti kam shym la long kaba suk. Ka jingiaid lynti kam shym long ruh kaba shai kdar. Ha ka jingshisha, ka la long kum ka jingiaid ha ka jaka ia kaba ym lah ban tip ia ki jingeh kiba kumno yn iatyngkhuh katba ngi dang iaid shakhmat, kaei kaba pynlong ia ngi ban iaid shakhmat ka long ban iohi ba ia ki jingeh kaba ki paidbah kila mad, ngi dei ban wad ia ki lad ki lynti ban pynbeit noh ia ki bad ban wanrah biang ia ka jinglong jingman kaba biang na ka bynta ki paidbah bad ki nongshong shnong bad ka dei katei kaba la ai mynsiem ba ngin iaid shaphrang” ula ong.

U Myntri Rangbah ula ong, ba ka jingpyniaid ia ki kam kaba kiwei pat kiba aplai ban ioh jingbit ban tih dewiong katkum ka jingstad saian ka dang iaid shakhmat.

“Ka long kaba kyllain bad kaba eh na ka bynta kito kiba nyngkong, ba-ar ne balai namar ba ki iaid ha ka lynti kaba kim pat ju tip, kim tip satia kiei ki jait jingeh kiba lah ban mih kynsan bad kan pynslem ia ki kam ki jam, hynrei mynta la don pat kiba la jam shakhmat bad iohi baroh ia kiei kiei, kumta mynta kan kham suk ia kiwei kiba don shadien ba kin iaid shakhmat namar la pyni lynti ia ki, kila lah ban pynwandur ia ka lynti bad kila lah mynta ban pyni ia kiwei bad kane kadei kaei kaei kaba ngi hap ban bud ia ki kyndon treikam” ong u Conrad.

Ula ong ba ka Meghalaya kala mad ia kiba bun ki jingeh, nalor ka bynta kaba iadei bad ki teknoloji, ngi lah don ia ka hok halor ka jaka bad ia ka jinglongtrai ia ka jaka kaba iapher na kiwei pat kiba don ha ka ri bad kumta ki don bun ki kyndon ki bapher, ki jingeh ki bapher kiba la mih kaba la pynlong ia ngi ba ngin shimpor ban pynurlong ia kane ka jingtih dewiong.

U Conrad Sangma ula ong ruh, ba da kane ka jingplie ia ka jingtih dewiong kaba nyngkong lyngba ka jingstad saian, ha ki snem kiban wan, kin dang bun kiban sa bud lang bad ka sorkar ka pynshlur ia kiwei ruh ba kin aplai khnang ba kane ka rukom treikam kan long kaba biang kumba ju long.

Katba ka Kong Santa Mary Shylla kala ai khublei ia u Myntri Rangbah ka jylla ba hapoh ka jingialam ka jongu ba ka jingtih dewiong da ka jingstad saian kala long kaba jingshisha ha ka jylla bad kala pynpaw ia ka jingkyrmen ba ka jingangnud ban pynkylla iaka Meghalaya kaba kynjoh iaka ioh ka kot kaba 10 Billion US Dollar hapoh u snem 2028 kan long kaba urlong hapoh ka jingialam u Conrad Sangma.

Kiwei kiwei kiba la ai jingkren ki kynthup ia u MDC ka JHADC Bah Hambertus Nongtdu, Deputy Commissioner ka East Jaintia Hills District u Shivansh Awasthi bad MLA barim ka Khliehriat u Bah Justine Dkhar.