Shillong, Lber 13 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ula pyntip ba haduh 97.5% ka jaka la dep ban aiti sha ka National Highway & Infrastructure Development Corporation Limited (NHIDCL) ban shna ia ka surok Shillong Western Bypass.
“Ia kaba sah ba 2.5% ka jaka, ki Deputy Commissioner ka East Khasi Hills bad Ri-Bhoi ki dang leh ia ka kam ba donkam ban pynthikna ban gin lah ban pynbeit ia kat ki jingeh kiba mih na ki trai jaka” ong u Bah Prestone haba jubab hapoh ka IIngdorbar ha ka kynta kylli jingkylli.
U iathuh ba T.455,39,34,752 la pynlut ha kaba thied jaka na ka bynta ka projecr kat kum ka RFCTLAAR Act, 2013 ha East Khasi Hills District bad T.121,40,63,701 ha Ri-Bhoi.
U Bah Prestone u pyntip ruh ba ka jingpyntrei ia ki lai tylli ki song (package) jong ka project kala sdang mynta bad ong “Ka jingiaid jong ka kam ka long kaba ihun”.
U Symbud Myntri Rangbah ula pynpaw ruh ba ka project kam shym la mad ia kano kano ka jingeh ha kaba iadei bad ki jaka puta lait noh tang ki jingkam bad jingiakam markylliang ia ka jinglong trai haba kular “Kum kine kiei kiei yn sa pynbeit noh da ki DC jong baroh artylli ki District”.
Halor ka jingkylli ba wanrah da u Nongialam ka Liang Pyrshah la ki don ki longiing ba khlem jaka ba shah ktah ha ka project, u Bah Prestone ula ong “Ha ka jingshisha ka mat kaba mih haduh kane ka khyllipmap ka dei kaba la shimkhia ban pynbeit da ki arngut ki DC. Ngi don hangne kum ka Sorkar ban iarap ia ki Longiing kiba shah pynkynriah. Lada ka lynti iaid ka surok ka iaid na kine ki jaka, ka Sorkar kan sa shimkhia ban leh eiei na ka bynta kine ki longiing”.
Ula pynshai ruh ba kam don satia kano kano ka jingpyndonkam bakla ia ka pisa jong ka project haduh mynta.
U Bah Prestone ula ong ba kam pat don satia kano kano ka jingujor ne jingkynnoh da ki trai jaka ba ka don ka jingkhate haduh 10 lane 20% ka bai jaka. “Ym pat don kano kano ka jingujor ba ioh pdiang da ki DC” ula bynrap.
 Bah Prestone Tynsong ula pyntip ba haduh 97.5% ka jaka la dep ban aiti sha ka National Highway & Infrastructure Development Corporation Limited (NHIDCL) ban shna ia ka surok Shillong Western Bypass.){kind=link}