Shillong Lber 11: U Myntri ka tnad Housing u Marcuise N Marak ha ka sngi Baar ula ong ba ka tnad kan iai bteng ban ai ka jingshakri ha ka ban ai ia ki iing kiba biang bad ban long kum ka atiar ban kyntiew ia ka jingim jong ki duk ki suk.
Haba kren haka jingiatai lyngkot halor ka Chief Minister’s Housing Assistance Programme (CMHAP), u Marcuise Marak ula ong ba ka tnad ka dang pyrshang katba lah ban sngewthuh ia ki jingeh bad ban pynmih ia ka lad ka lynti kaba biang tam ban pyntreikam ia ki buit kiba thymmai ha ka rukom treikam ka jong ka.
“Ka Tnad ka dang pynhreh bha ialade bad ka long kaba kloi ban pdiang ia ki jingai jingmut kiba thymmai ban lah ban pynurlong ia ka thong ka jongka da kaba buh ha ka jingmut jingpyrkhat na ka bynta ka bha ka miat jong ki duk ki suk bad kiba kyrduh kiba don ha ka jylla bad ban bteng ban ai ia ka jingshakri ban ai ia ki iing kiba biang bad ban long ka atiar ban kyntiew ia ka jingim bad ia ka burom jong kiba duk ba suk” ula ong bad ka bynrap, “Da ka jingkylla ka por, ka tnad ruh kala iaid shakhmat ban pynkhreh bha ialade ban iaid katkum ka jinglong jingman, kaba iaid lang bad ka roi ka par bad ka jingdawa kaba man la ka sngi kum ka jingpynneh pynsah, ka jingdon bad ka jingiadei bad ka mariang na ka bynta ka jingmyntoi jong ki nongshong shnong. Nga kyrmen skhem lyngba kine ki jingshimkhia jongka Tnad Housing kan ai jingmyntoi ia ki paidbah kiba sah ha ki thain nongkyndong bad ha sor”.
U Myntri ula pynkynmaw ruh, ba ka Tnad mynshwa kala pyntreikam ia ka Rural Housing Scheme (RHS) ha kaba la ai 3 song ne Bundle ki tin Corrugated Galvanised Iron (CGI) kum ka grant-in-aid ia kito kiba lah ban tei ia ka iing ka jongki lyngba ka jingdon jingem ka jong ki hi.
Kila don baroh 71, 632 ngut kiba la ioh jingmyntoi na ka skhim RHS kaba mynshwa.
Hynrei ka jingpyntreikam ia katei ka skhim kam shym la long pat kaba sngewhun namar ba tang katto katne kiba applai kila ioh ha ki district kaba long kaba ym iahap na ka bynta kiba hap pat ban ap da ki snem ban ioh ia ka jingiarap lyngba kane ka skhim bad la sngew donkam ban kynthup bun shuh shuh, da kaba buh ha ka jingmut jingpyrkhat namar ka jingroi jong ki longiing longsem bad katkum ka jingioh pdiang ia ki jingdawa.
“Kumta ka sorkar kala rai ban pynsangeh noh ia ka jingpyntreikam ia kane ka skhim RHS bad ha ka jaka ka jongka, la sdang noh ia ka Chief Minister’s Housing Assistance Programme (CMHAP). La sdang ia ka CMHAP ha u snem 2017 bad la pyntreikam naduh u snem 2017-18 shaneng. Kane ka skhim ka kynthuplang ia ki jaka ha sor bad nongkyndong kiba don ha ka jylla lyngba ki C&RD Block bad Urban/Municipal”la pyntip u Marak.
Ka jingthmu jong ka CMHAP ka long ban pynbiang ia ki tiar ki tar ban shna ia ka sad ban pynbha shuh shuh ia ki iing kiba la don lypa jong ki longiing kiba duna ha ka ioh ka kot da kaba ai 3 song ia ki tiar ki tar sha ki nongioh jingmyntoi kiba la shah jied bad ban pynioh ia ka iingsah na ka bynta ki longiing kiba duk kiba sah ha ka jylla da kaba ai iaka jingkyrshan pisa kaba long T.75000 sha mana la kawei ka longiing” ula bynrap.
U Myntri ula pyntip kumba long mynta, ka tnad ka pynbiang ia ki bynta kiba hakhmat da kaba ai ia ki Aluminium Roofing Sheet sha ki longiing kiba duk kiba dei ban ioh jingmyntoi da kaba pynshong nongrim katkum ka thong kaba la buh ha man la ki C&RD Block bad ki jaka kiba don ha sor.
Kumba la long mynta, ka bynta ka baar jong ka skhim ym pat pyntreikam, hynrei ia ka jingai jingiarap pisa kaba T.75000 la pynbiang na ka bynta ki longiing kiba duk ha kaba 130 ngut kila ioh jingmyntoi hapoh jongka South West Garo Hills district hapoh u snem 2017-18 (100 ia ka Betasing C&RD Block bad 30 tylli ha ka Damalgre C&RD Block).
