Shillong, Lber 05: Ka Sorkar Jylla ka dang ap ban ioh ia ka jingmynjur na ka All India Council for Technical Education (AICTE) ban sdang ia ka jingai jinghikai ha ka College of Architecture and Urban Planning ha Tura, West Garo Hills District.
“Wat hapdeng ki jingeh, la dei ban tei ia ki jingtei baroh bad mynta ngi dang don ha ka kam ban ioh noh ia ka jingmynjur na ka AICTE (ban sdang noh ia ka jingpule ha kane ka college),” la ong u Myntri ka Pule Puthi u Rakkam A Sangma haba jubab hapoh ka iing dorbar thawain ka jylla hynne ka sngi Balang.
Ula pyntip ba ka sorkar kan sa pan ia ka jingbit ha u Nohprah mynta u snem namar ba ia ka website na ka bynta katei ka kam la plie tang ha katei ka por.
U Myntri ula pyntip ruh ba ka pisa kaba mang baroh da ka sorkar India na ka bynta katei ka projek ka long T.26 Klur ha kaba ka jingbei tyngka ka long 90 na ka sorkar India bad 10 yn pynlut da ka sorkar jylla bad haduh mynta ka sorkar India kala dep ban pyllait ia ka pisa kaba kot T.23.4 Klur.
U Nongialam ka Liang Pyrshah u Mukul Sangma haba kylli jingkylli, ula pynpaw ia ka jingsngewkhia halor ka jingpynslem ban sdnag noh ia ka jingpule ha katei ka college bad ula ong, “Kadei ka projek kaba la bei tyngka da 90:10 bad ngi la khanglad ban ioh shuh ia ka bhah tyngka (na ka sorkar pdeng). Ngim lah tang ban shu seng tang ia kawei ka College ha Tura haba da ki hajar ngut ki samla pule na kylleng ka jylla ki donkam ban leit pule ha katei ka lain jingpule”.
Katba u Myntri Rangbah ka jylla u Conrad K Sangma uba la tuklar halor kane ka mat, haba u Nongialam ka Liang Pyrshah ula kynnoh ia u Myntri Sorkar ba ua pyrshang ban ym iathuh lut ia ki jingtip ha kaba iadei bad katei ka projek ha kaba ym shim la batai ia kidaw jong ka jingpynslem. U Myntri Rangbah ula iada bad ong ba u Myntri ym don ia kano kano ka jingthmu ban ym ailut ia ki jingtip.
Ula pynshai ruh ba ka jingpynslem ban pyndep ia ka projek kadei namar ba kala don ka jingsaphriang ka khlam COVID bad ka jingbym biang ki surok. “Ngi dap da ka jingkmen ba mynta ka kam kala dep lut bad ngin sa sdang noh ia ka jingpule shen” ong u Myntri Rangbah.
 ban sdang ia ka jingai jinghikai ha ka College of Architecture and Urban Planning ha Tura, West Garo Hills District.){kind=link}