Shillong, Lber 04 : U Myntri Rangbah ka Jylla Conrad K Sangma ha ka sngi Ba-ar ula pyntip ha Iingdorbar ba ka Sorkar Pdeng kala bthah ia ka Sorkar Jylla ban pynphai noh ia ka pisa ba T.200 klur bala mang ban thied jaka na ka bynta ban pyniaid ia ka lynti rel ha Meghalaya.
“Ngim pat thied jaka satia namar ka jingpyrshah kaba jur ia ka project lynti rel. Ngi la iohpdiang ia ka shithi na ka Northeast Frontier Railway (NFR) ha ka 17 tarik Nohprah, 2024, ba bthah ban pynphai noh ia ka pisa naba ngi khlem lah ban pyndonkam la 7-8 snem” ong u Conrad ha ka kynta kylli jingkylli.
“Namar ba ka dei ka kam kaba kynrum kynram, ka Sorkar kam shym la pyniaid shakhmat ia ka kam thied jaka. (Namar ka jingpynslem) ka Sorkar India kala bthah ia ngi ban pynphai noh ia ka pisa” ula ong.
La kan dei ka project ban pyniaid ia ki rel kit briew ne rel kit mar, u Conrad ulapyntip ba ka Sorkar kala iakren ha kiba bun ki rynsan hynrei kala don ka jingpyrshah kaba jur ia ka jingtyrwwa ban siang ia ki lynti iaid rel. Kumta ngim shym la lah ban pyniaid shakhmat ia ka kam”.
U Myntri Rangbah ula kular ruh ba kaSorkar kan sa iasyllok iabaroh ki kynhun bapher bapher hashuwa ban shim rai ban pyntreikam ia kum kine ki project ba kongsan.
“Nga la dep iakynduh ruh ia u Myntri ba dei khmih ia kane ka kam la bunsien bad ha ka jingiakynduh ba khatduh, nga la aiksai ia u MYntri ba ngim shym la lah ban pyniaid shakhmat ia ka project namar ka jingpyrshah kaba jur ban siang ia ki lynti iaid ki rel” ula ong.
Haba pynpaw ia ka jingdonkam jong ka rel, u Myntri Rangbah ula ong “Kum ka Sorkar Jylla, ngi sngew ba ka long kaba donkam ban don ia ka lynti rel haba khmih ha ka liang ka ioh ka kot ban pynkit ia ki mar naba kan pynsuk bha ia ka kit ka bah ia ki mar na Jylla bad na shabar Jylla ruh kumjuh”.
U MLA ka North Shillong Bah Adelbert Nongrum ula pynpaw ia ka jingsngew ba ka lah ban don ka jingiapynbeit ba sop sop kaba lam sha ka jingmang pisa ka Sorkar Pdeng ia palat T.200 klur sha ka Jylla.
Haba kynthoh ia kane, u Myntri Rangbah ula ong ba kam shym la don satia kano kano ka jingiapynbeit sop sop namar ka pisa ka dei beit thik tang na ka bynta ban thied jaka.
Shuwa kane, u Symbud Myntri Rangbah ba khmih ia ka Tnad Transport Bah Sniawbhalang Dhar ula ong ba ka Sorkar kala mang ia ka pisa ba T.200 klur ha ka 30 tarik Lber, 2017.
