Shillong, Lber 03 : Ka NorthEast United kan hap ban jop da long kumno kumno ruh pyrshah ia ka Chennaiyin FC ha ka jingia khun ban long mynta ka sngi, haba thikna ba ka jingjop kan pynlah ia ki ban rung sha ka ISF playoff.
Ka NorthEast mynta ka don ha ka kyrdan ba 6 da 32 point na ki 22 tylli ki jingiakhun bad ka Odisha ka don hadien da 30 point bad sah sa kawei ka jingiakhun, wat ka jingiakhaid ruh kam pat biang ia ka NorhEast ba kan iohrung.
Hapoh kane ka ISL format bala wanrah ha u 2022, hynriew tylli ki kynhun ialehkai kin ioh rung sha ka playoff kaba shong kat kum ka jingioh kamai point. Ia ka League shield ki nongjop la ai sha ki kynhun ba kamai bun point eh katba ia ka ISL Cup la ai sha ki champion ka playoff. Lada ka jingiakhun knockout ka kut ha ka jingiakhaid, ka extra time bad ka penalty kan rai ia ki nongjop.
Haba kren hashuwa ka jingiakhun, u Assistant Coach Naushad Moosa ula ban jur ba ka kynhun kala pynleit jingmut pura ha ka jingialehkai.
“Kaei kaba kongsan ka long ba ngin ialehkai bha. Ngin ialehkai kat kum ki plan jong ngi bad ialehkai bha naduh kaba sdang haduh kaba kut bad kan sa mih ka result” ong u Moosa hashuwa ka jingiakhun.
Ula bynrap “Man ki rang ialehkai ki tip ia ka jingkongsan jong ka jingiakhun. Ngim (coaching staff) donkam ban pynkyn maw ia ki. Ha ki jingkilan met, ngi lah ban iohi ia ka jingpynbeit jingmut jong ki. Ki kwah ban mih sha madan bad ban ioh ia ka jingjop”.
