Pynkhreh ban wanrah ia ka Policy Thungkam ban pynkut ia ka jingthungkam pathar
Shillong Rymphang 28: U Chief Executive Member bathymmai ka Khasi Hills Autonomous District Council u Bah Shemborlang Rynjah, ula ong ba ka Executive Committee kala rai ba kan ym ai Trading License shuh ia ki bar jylla lada ia ka kam kaba ki mut ban trei kadei kaba lah ban trei da ki Khasi.
“Ngin ym ai Trading License thymmai ia kino kino ki kam kiba ki Khasi kila lah ban trei. Katta ka dei kaba ngi buh hakhmat eh ha ka thong ka jongi bad ngin ia peit ia ki lad ki lynti kaba ngin leh ban pyniaid ryntih katkum ka lynti kaba dei, khnang ba ki samla ki jong ngi, kiba don ia ka jingangnud bad ieng ha la ki jong ki kjat kin ym duh jingkyrmen” ong u CEM haba iakren bad ki lad pathai khubor.
“Ka ain kala don lypa kumta ngin bud ryntih ia kata ka ain bad lada donkam ruh, ngin nang pynskhem bad pynbha ia ka khnang ba ngin ioh ia ka jingangnud jong ngi” ula bynrap
Ula ong ruh ba, ka EC kan wanrah ruh ia ka polisi ha kaba iadei bad ka thungkam thungjam hapoh ka council.
“Ngi angnud ban wanrah iaka polisi ha ka thungkam thungjam, ha ka jingpeit ka jong ngi bad na ka liang ka jong nga, ngi lah iohi bad nga i sheptieng hynrei ngan dang khmih bniah bha ia kane. Ng sheptieng ioh ka Council ka don ha kata ‘Disguised Employment’ ne ka jingbun ki nongtrei ban ia ka kam kaba don. Ngin peit bniah bad ngin leh kloi ban don iaka polisi thungkam khnang ba kan long kaba ryntih bad kino kino kiba rungkam hapoh ka ophis jong ka Council kan long da kaba lynti kaba beit ba ryntih khnang ba ki khun samla kiba dei hok ban ioh kam, kin ioh bad kan ym don shuh kaba shu ialeh lymmuh ne ia thung katba ia mon” ong u Bah Shemborlang.
Une u CEM ba thymmai ula pyntip ruh ba ka kam kaba hakhmat eh jong kane ka EC ba thymmai ka long ban pynbeit ryntih ia ka rukom treikam jong ka District Council.
Haba pyntip ba ka VPP kala ioh pdiang ia ki jingud jingnam ki paidbah haba iadei bad ka Building Byelaw jong ka Council, une u CEM ula ong “Ngin sa pynbeit ryntih ia kane ka kam ba kan ym don kano kano ka jingpynwit ne ka jingthlia ne ka ban ktah ia ka kam kaba ki longiing ne khamtam ki longiing kiba duk ban thaw ia la ki iing ki sem ki jongki ha la I bor kaba ki lah”.
“ Na ka liang ka Council ngin sa peit ia kane ruh ban pynthikna ba ka ain kan ym long ka jingpynduh jingkyrmen kaban pyndik, pynkthakhlieh ia ki longiing longsem kiba angnud ban thaw ia ki iing. Hynrei lyngba ka Building Byelaw, ngin peit pat haba ki thaw iing thaw sem kam dei pat ban ktah ia ka mei mariang, ban ym pynjakhlia ia ka umbam umdih. Ngin hap ban peit bha ruh ia ki jingtei kiba dei ki Commercial khnang ba kan ym wanrah pat ia ka jingma hadien habud” ula bynrap.
Haba kren halor ka kam khappud, une u CEM ula pyntip ba ka EC kan sa pynbeit kyrpang ia ki jaka jong ki briew kiba sah ha khappud bad ban thaw ia ki lad ki lynti ha kaban wanrah ia ka jingshngain na ka bynta jong ki.
