Shillong, Nailar 29: Ka Iingkashari Meghalaya High Court hynne ka sngi nyngkong, kala bthah ia ka Sorkar Jylla ban wanrah da ka plan ( Blueprint) ba kdew kumno ban weng noh shipor bad ban weng shirta ia ka jingdheng kali hapoh ka Nongbah Shillong.
Haba shong bishar ia ka PIL, ka Iingkashari ki arngut ki Nongbishar ba kynthup ia u Chief Justice Sanjib Banerjee bad Justice W Diengdoh kala ong ba ha ka jingai jingmut jong ka Iingkashari, u Advocate Genetal ula mynjur ban pan ia ka jing ai jingmut jong ka Indian Institute of Management (IIM) Shillong, lada long kaba lah, ban iarap pynkhreh ia ka Blueprint ne ka plan ban lah pynduna ia ka jingdheng kali bad jingiaid beit ki kali hapoh ka Nongbah Shillong.
“Kan bha shibun lada lah ban pynkhreh ia ka map jong ka Shillong bad ia ki lad ki lynti ba shipor ban pyllait na kane ka jingeh ba mynta, haba phai sha ka jingpynbha ne shna ia ki surok, bad ban kdew ruh la ka jong ia ki sienjam ba shirta khnang ban lah ban pynduna ia kane ka jingeh ha kine ki khyndiat bnai bad snem ban wan bad haduh kut ban weng shi syndon ia ka jingeh ha kine ki san ne hynriew snem ban wan” ong ka Iingkashari.
Haba kdew ia ki katto katne ki sienjam ba dei ban shim, kala ong ba kawei na ki lynti bala kdew kham mynshuwa da u Advocate General na ka bynta ka Sorkar Jylla, ka dei ka jingthied ia ki bos elektrik.
Ka Sorkar kala pyntip ruh kham mynshuwa ba kiba bun ki Kmie ki Kpa jong ki Khynnah Skul kila mynjur ba lada don noh ki bos sorkar ne Public Transport System, ban kit ia ki khynnah skul, kin nym sei shuh ia ki kali shimet ban leit buh skul ka ba lah ban pynkhapngiah ia ki surok ba marjan ki skul.
Kawei pat ka jingpynpaw jong ka Sorkar Jylla ka long ba kan pyniaid noh da ki Public Transport System bad ban khmih bniah ia ka jingiaid ki kali ha ki katto katne ki jaka ba khapngiah ki surok.
Haba kdew ia ka sienjam kaba shirta, ka Iingkashari kala ban jur ba dei ban khmih ruh ia ka jingpyndonkam noh ia ki Ropeway bad ki Cable Car lada long kaba ibit ban pyntreikam kat kum ka jingtyrwa jong ki riewshemphang.
Ka Iingkashari kala buh ban shong bishar biang ia kane ka mukotduma ha ka 23 tarik u Nailur.
