Shillong, Feb 28: Ka sorkar jylla kala ai jingmynju ia ki 6 tylli ki Amendment Bill, ia kaba yn sa rah na ka bynta ban ioh jingmynjur ha ka dorbar mang tyngka jong ka iingdorbar thawain ka jylla kaba nsdang naduh ka sngi Thohdieng.
Kitei ki kynthup ia ka Meghalaya State Investment Promotion and Facilitation Bill 2025, Meghalaya Fiscal Responsibility and Budget Management Act, Meghalaya Goods and Services Tax Amendment Bill 2025, Water Prevention and Control of Pollution Amendment Act, Meghalaya Police Act and Meghalaya Registration of Birth and Death Amendment Rules.
U Myntri Rangbah ka jylla u Conrad K Sangma ha ka Sngi Balang ba ka sorkar kala pynkylla ia ka Meghalaya State Investment Promotion and Facilitation Bill 2025 bad ia kane yn sa rah ha ka iingdorbar thawain.
Ha kaba iadei bad ka jingpynkylla ia ka Meghalaya Fiscal Responsibility and Budget Management Act, u Conrad Sangma ula ong, “Ia kane ruh la wanrah teng ha ka por jong ka 15th Finance Commission, ia ka Deficit la shah haduh ka 3.5%. Kane kadei kaba la leh ha baroh kawei jong ka ri katkum ki kyndon jongka Sorkar India bad ka Reserve Bank”.
Ha kaba iadei bad ka Corpus Fund, u Myntri Rangbah ula ong, “Ngi lah pynkiew ia ka Corpus Fund na ka T.500 Klur sha ka T.1005 Klur bad kane ka long namar ba ka jingbhah tyngka kaba la don mynshwa ka long kaba duna bha, kumta ia ki kyndon la hap ban pynkiew noh, ka pisa ka don bad ngi hynrei ba ngin ioh ban pyndonkam, ngi donkam ia ki kyndon ha ka jingbhah tyngka. Kumta la thaw ia kane namar ba ngi lah ioh shuh shuh ia ka bhah lyngba ki khajna, ka pisa kaba wan lyngba ki CSS bad kiwei kiwei”.
Ula pyntip ruh ba ka Meghalaya Goods and Services Tax Amendment Bill 2025 kadei kaba la ai jingmynjur kaban iaid ryngkat bad ka rai kaba la shim da ka GST Council bad ka jingpynkylla ia ka Water Prevention and Control of Pollution Amendment Act la leh da kaba iaid ryngkat lang bad ka ain jong ka Sorkar Pdeng.
Ha kaba iadei bad ka rai ban pynkylla ia ka Meghalaya Police Act, 2010, u Conrad Sangma ula ong, “Ka hokum kaba la pynmih da ka Supreme Court kala kdew, “Shisien b aula shah jied na ka bynta ka kam, u dei ban don ia ka jingtreikam kaba ym duna ia ka ar snem khlem da khein ia ka tari kaba ula shah jied, kane kadei ka hokum jong ka iingbishar”.
Hynrei ha ka Police Act kaba ngi la thaw ha u snem 2010 kaba long hashwa ba ka Supreme Court kan ai ia katei ka rai, kumta ia kum katei ka kyndon kam shym la don ha ka Police Act kaba mut ngi bud ryntih ia ka hynrei ia ka ain donkam ban pynkylla ban pynrung ia katei ka bynta ha ka Meghalaya Police Act.”
Nalor kane ula ong ba ka Meghalaya Registration of Birth and Death Amendment Rules kadei kaba la mynjur khnang ba kan iaid lang ryngkat bad ki kyndon jong ka Sorkar Pdeng.
Ka long kaba suk, ka jingwanrah ia ka jingpynkylla kadei kaba la leh ban weng ia ka jingbym iahap ha ka kyrteng, tarik ne ka jaka sah. Kam don eiei hynrei kadei tang ban pynbeit ia ka rukom treikam ha ka jingleh ia ka Registration.
