Shillong Rymphang 28: Ka Iingkashari Meghalaya High Court ha ka sngi Palei, kala pynksan ia ka hukum jong u Lamphang ka Iingdorbar Thaw Ain Thomas A Sangma ban nym ailad iatai ia ka special motion ba wanrah da u MLA ka VPP na North Shillong Bah Adelbert Nongrum myn ha ka 15 tarik Rymphang, 2024 ba iadei bad ka kaiphod CAG halor ka Soubhagya scheme.
Ha ka hukum, ka Iingkashai ba kynthup ia u Chief Justice IP Mukerji bad Justice W Diengdoh kila ong “….kam don satia kano kano kaba long bei-riti lane beain ha ka jingtreikam jong ka Lamphang kaba khring ia ka jingtuklar jong ka Iingkashari”.
Kala ong ba ha kane ka mukotduma, ka motion ka dei kaba dang kloi palat namar ia ka kaiphod audit kat kum ka Rules of Procedure and Conduct of Businees ha ka Iingdorbar Meghalaya Legislative Assembly, ka dei kaba hap ban rah hakhmat ka Committee of PublicAccounts, ba kan shong bishar kat kum ka Rule 241 jong ka Rules of Procedure and Conduct of Business of the Meghalaya Legislative Assembly.
“La pynkupbor ban leh ia kata hapoh ka Article 151(2) jong ka Riti Synshar ka Ri kaba ong ba ia ka kaiphod jong u Comptroller & Auditor General of India ba iadei bad ki Account jong ka Jylla dei ban aiti sha u Lat ka Jylla uban bthah ban wanrah ia ka hapoh ka Iingdorbar jong ka Jylla. Dei ruh ban pule lang bad ka Article 208 jong ka Riti Synshar ba aibor ha ka Iingdorbar ba kan thaw ia ki rule ban buh kyndon ia ka rukom pyniaid ia ka dorbar” ong ka Iingkashari.
Kat kum ka hukum, ka Article 212 kala wan hapdeng ka lynti jong ka Iingkashari ban bishar ia ka rukom pyniaid ia ka Iingdorbar.
“Hadien bala dep bishar ka Public Accounts Committee ia ka kaiphod, kan sa ai ka lad ia u nongmudui ban buh ia ka special motion ba thymmai, lada u kwah ban leh. Da kane ka jingshem, ngi pynskhem ia ka hukum bad pynkut noh ia kane ka jingkyrpad” kala ong.
