Sahteng haduh 10 tylli ki project ka DoNER ha Meghalaya kynthup ka lynti rel

Shillong, Rymphang 26 : Haduh 10 tylli ki project bala bei tyngka da ka Development of North Eastern Region (DoNER) Ministry, ki dei kiba dang sahteng ban pyndep ha Meghalaya kynthup ka jingpyniasoh lynti rel.

Ia kane la pyntip da u Myntri Khynnah ka DoNER Dr Sukanta Majumdar hynne ka sngi Balang haba ban jur ia ka jingkong san ki lad pyniasoh na ka bynta ka jingkiew ka roi ka par ha ka Jylla bad ka thain baroh kawei.

Haba kren sha ki nongthoh khubor, u Dr Majumdar ula ong “Ka lynti rel kala slem namar katto katne ki bynta jong kane ka project ka dei kaba iaid lyngba ka Bangladesh. Kala jan dep artad kumba 100% hynrei ka Railway Board kala kdew ia ki katto katne ki jingduna ha ka bad ka jingpynbeit mynta kala iaid shakhmat bad ha kine ki khyndiat bnai ngin sa sdang noh ia kane ka lain”.

Haba pan ia ki jingsngew jong u halor ka jingpyrshah ki Sengbhalang ka Meghalaya ia ka project lynti rel, une u Myntri Khynnah ula ong “Phi tip ba ki lad pyniasoh ka dei ka kam kaba donkam na ka bynta ka roi ka par jong kano kano ka Jylla bad kano kano ka thain. Khlem ki lad pyniasoh phin ym lah ban pyntrei ia ki kam pynroi bad ka kam ka long ba mynta ngi la don bun bah ki samla bala nang la stad ha man ki Jylla bad ki dei kiba donkam ia ka kam. Kumta, nga sngew ba ngi dei ban pdiang ia kane ka jingshisha bad ngi dei ban iarap pyniasoh ia ka Jylla la ka dei hapoh ka Ri ne shabar ka Ri bad shibun ki kam la leh hapoh ka jingialam u Narendra Modi bad ka dei ha ka sien ba nyngong ha kylleng ki Jylla ba la pyniasoh lynti rel. Kumta, ka lad pyniasoh ka dei kaba kongsan bha”.

Ula ban jur ruh ba ka Sorkar Meghalaya ka dei ban ithuh ia ki Shnong bad ki sor rit ha ki shnong khappud na ka bynta ban pyntrei ia ki kam pynroi bad ong “Ka DoNER Ministry bad kumjuh ruh ka Sorkar Meghalaya ki dei ban iatreilang ha kaban pyndep noh ia ki project kiba heh hapoh ka Jylla”.

Ha kajuh ka por, u Myntri Khynnah ula bthah ia ka Sorkar Jylla ban pyntrei sted noh ia ki 10 tylli ki project ba sahteng ban pyndep.

“Ngi la iakren ruh ia ka jinglong jingman jong ki project bala pynslem bad ka Sorkar Jylla kala treikam bha bad ki kwah ban pyndep noh ia baroh kine ki kam hapoh ka por ka ba biang” ula ong.

Haba kylli, u Dr Majumdar ula ong “Napdeng kine ki project ba sahteng , don kiba lah ban pyntreikam bad don ruh ki bym lah ban pyntreikam. Hapoh kine ki khyndiat sngi ban wan, ka Sorkar Jylla kan sa aiktien sha ka DoNER Ministry, kaba kdew ba kine ki project kiba lah ban pyntrei bad hadien kin sa pan ia ka song pisa ia kiwei pat ki project. Kiba bun ki project ki dei kiba la jan dep 100 % lane lah dep 80% haduh mynta hynrei haki kot ki sla la pyni ba ki dei ki project ba sahteng namar hadien ba pyndep ia kawei pa kawei ka project, ka don ka rukom treikam ban aiti ia ka completion certificate bad ruh ki kam ba hap pyndep da ka Sorkar”.

Ha kajuh ka por, u Myntri khynnah ula pyntip ba ka Meghalaya ka dei kaba ialam hakhmat eh hapoh ka SDG Group-1 haba phai sha ka jingialeh ban rat dyngkhong ia ka jingduk, ban pynioh ia ki lad jingsumar kiba paka, ban kyntiew ia ka bha ka miat ki nongshongshnong, ban pynbiang ia ka umbam umdih hynrei ka duna ha ka liang ka jingpynbiang ia ka pule dangle ba janai, ki karkhana bad ki buit treikam. Hynrei ula ong “Nga sngew ba hapoh ka jingialam jong u Myntri Rangbah, ngin sa lah ban wanrah ia ka Jylla sha khmat ha kine baroh”.