Shillong, Rymphang 24: Ka Shillong Lajong FC kala pynrem ia ka Nangkiew Irat da 4-0 ha ka OC Blue Shillong Premier League 2024 kaba la long hynne ka sngi Nyngkong ha SSA Stadium, First Ground, Polo.
Katba ka Nongrim Hills SC kala pynrem ia ka Nongthymmai SC da 2-1 ban kiew sha ka kyrdan kaba 7 ha kane ka lympung iakob ialehkai football.
Ka jingakhun ha ka kylla step kala kut ha ka jingiakhaid ha kaba baroh artylli ki kynhun watla kila ioh ia ki kabu kim shym la lah satia ban thep kol hynrei ha ka kylla miet, u Deibormame Tongper ula thep ia ka kol ha ka 60 bad 68 minit, u Yohaan Benjamin ula thep ia ka kol ha ka 69 minit bad u Riborlang L Lyngkhoi ula thep ia ka kol ha ka 75 minit na ka bynta ka Lajong.
Da kane ka jingjop, mynta ka SLFC kala ioh 36 point bad kala duna sa tang 2 point ban ia ryngkat bad ka Mawlai SC kaba la ioh 38 point kaba bat ia ka kyrdan kaba nyngkong.
Katba ka Nongrim Hills kala knieh noh ia ka kyrdan kaba 7 na ka Sawmer SC bad ka Nongthymmai kala don ha ka kyrdan kaba 9 kaba lah ban shah pynhiar kyrdan noh sha kawei pat ka Division bad ka Nangkiew Irat kala neh hi ha ka kyrdan kaba 6 da kaba tam tang 1 point ia ka Nongrim Hills.
Ha ka jingiakhun ka baar, u Nickhil Lyngkhoi ula thep ia ka kol na ka bynta ka Nongrim Hills ha ka minit kaba 37 hynrei u Pynshailang Kharduid ula ioh noh ban pyniakhaid da kaba thep ia ka kol ha ka 45’+2 na ka bynta ka Nongthymmai.
Watla ka jingiakhun kala sdang ban itynnad bad la kumba kan kut noh ha ka jingiakhaid hynrei u Bankitboklang Nongrum ula thep ia ka kol ha ka minit kaba 88 bad kaba la pynthikna syndon ia ka Nongrim Hills ban khur ia ka jingjop.
Ha ka sngi Baar, ka jingiakhun kan long hapdeng ka Langsning FC pyrshah ia ka Laitkor SC ha ka por 11 baje mynstep bad ha ka por 3 baje mynsngi ka jingiakhun kan long hapdeng ka Mawlai pyrshah ia ka Rangdajied United FC.
