Guwahati, Nailar 29 : Ka thma ktien lyngba ka Twitter hapdeng u Myntri Rangbah (CM) ka Delhi, u Arvind Kejriwal bad u CM ka Assam u Himanta Biswa Sarma ka dang iai bteng, ha ka ba na ka liang u Sarma hynnin ka sngi u Blei ula ong ba ia ka nongbah jong ka ri dei ban ianujor bad ka ‘New York bad Tokyo’ ha ka jaka jong ka Guwahati bad Shillong.
U CM ka Assam ula ong ruh ba um don ia ki jingmih kumba long ka Delhi, hynrei ula pyniaid ia ki 40,000 tylli ki skul haba ia nujor bad ki 1200 tylli kiba u Kejriwal u pyniaid.
“Ka Delhi ka dei ka nongbah jong ka India naduh ka por ka jingsynshar da ki Mughal. U la dei ban ianujor ia ka Delhi bad ka New York kumjuh bad ka Tokyo ha ka jaka ban ianujor ia ka Guwahati bad ka Shillong”.
“Ngam don ia ki jingmih kiba biang kumba long ka Delhi, hynrei ula ialam ia ki 1,200 tylli ki skul bad Nga pyniaid 40,000 tylli ki skul ha ka jylla,” ong shuh shuh u Sarma.
Nalor kata hynnin ka sngi u Blei hi, u Sarma ula leit lyngba ka Twitter bad pynkynmaw ia u Kejriwal halor ki jingkular ki jong u ba lada un wan ha ka bor un pynkylla ia ka Delhi kum ka sorbah London bad Paris.
Hynrei, na ka liang ka sorkar u Kejriwal kam shym la lah ban pynurlong ia kane ka jingkular bad mynta ula ia nujor ia ka Delhi bad ka Assam kumjuh bad kiwei pat ki jaka sor kiba rit jong ka thain shatei lammihngi (northeast).
Shuh shuh ula ong ruh ba lada ka BJP kan wan ha ka bor ha Delhi, kan pynkylla ia ka Delhi kum kawei na ki sorbah kaba roi sted ha ka pyrthei.
Kane ka jingiakynthoh markylliang hapdeng kine ki arngut ki CM kala sdang naduh kane ka taiew ba la lah, kata hadien ba u Kejriwal ula kynthoh halor ki jingmih khubor kiba kam ba ka sorkar Assam kala pynkhreh ban khang khyrdep noh ia ki skul kiba ka jingpass ka long 0 percentage da kaba ong ba ka jingkhang ia ki skul kan ym lah ban weng ia ki jingeh.
Kane ka jingiatai kala bteng haduh hynnin ka sngi U Blei ha ka ba na ka liang utei u nongialam ka AAP ula bteng ban kylli lano un wan ban peit ia ki skul sha kane ka jylla ka thain Northeast.
“U Kejriwal u kwah ban khot sngewbha ia nga sha Assam.Nga la dep lypa ban khot sngewbha ia u Dy. CM ka Delhi, u Manish Sisodia, lehse ula ioh ia ka jingpyntip na ka iingbishar kumjuh.U (Kejriwal) u lah ruh ban wan lada u kwah,” jubab u Sarma.
