Imphal, Nailar 29 :Ka mat kaba iadei bad ka jingkyrduh kam kyrduh jam ka dei kawei na ki jingeh kaba wanrah ka jingbitar bad klumar jingmut hapdeng ki samla ha ka thain shatei lammihngi (Northeast) jong ka ri, ong u Lat ka Manipur, u La Ganesan.
Ia kane u Lat ula pynpaw haba aijingkren ha ka prokram bala ai kyrteng “Inspiration Episode 18”, ia kaba la pynlong hapoh ka Convention Centre ha ka sorbah Imphal.
Ula ong ruh ba ka jingkyntiew ha kaba iadei bad ki nong seng kam lajong ka dei ka mat kaba kongsan tam na ka bynta ban kyntiew ia ka ioh ka kot bad ka roi ka par hapdeng ki nongshong shnong jong ka thain.
Ula ong ba ki nongseng kam lajong ym tang ba ki ai kam na ka bynta jong u, hynrei ka plie lad plie lynti ruh na ka bynta kiwei pat.
Nalor kata u Lat ula ong ruh ba ki nongseng kam jong kane ka juk kaba mynta ki donkam ia ka jingtbit ha ki liang ki jingtip nalor ki lad jingiarap psia bad ka jingtbit ha ki kam pyniaid iew khnang ban lah ban ialeh pyrshah ia ki jingeh bad ban ia aireng bad kiwei pat.
Shuh shuh u Lat ka Manipur ula ong ba kala don ka jingpyrshang borbah ban tehlakam ia ka jingkyrduh kam kyrduh jam ha kane ka thain northeast hi baroh kawei.
“Ka donkam ban wad ia ki lad ki lynti bad ki jingiashim bynta khnang ban khring ia ki riew shemphang ha kaba iadei bad kane ka bynta,”ula ong shuh shuh.
