Shillong Nailur 29: Ki nongialam jongka Jaintia Students Union (JSU) ryngkat ki nongialam ka seng. A Elaka Labang Nongphyllut hynne ka 29 tarik u Nailar kila leit ai da ka dorkhas ha u heh ophisar ka jylla Bah Cyril V Diengdoh ban dawa na ka sorkar ba iaki jaka kiba hap ha Block 1 dei ban pynhap biang sha Meghalaya.
U General Secretary ka JSU u Samla Treiborlang Suchen ula ong, ka seng kala phah lang ia katei ka dorkhas sha u Myntri Rangbah ka jylla bad sha u Chairman ka Regional Committee u Bah Snaiawbhalang Dhar bad la iati ruh iaki kot ki sla ban pynshisha bad pynskhem iaka jingdawa ki nongshong shnong ka jaitbynriew Khasi- Jaintia ban pynphai noh iaka Block 1 sha Meghalaya.
Ula iathuh, ba u Bah Cyril ula pynpaw ha ki nongialam ka seng, ba ka sorkar kan shim khia ia kane ka mat bad yn sa rah ia katei ka mat ban pynsngew ha u Myntri Rangbah ka jylla ba yn leh ia kaba donkam.
U Samla Treiborlang ula ong, ka seng ka kyrmen skhem ba kane ka jingpynbeit jaka hapdeng ka sorkar Assam bad Meghalaya ki dei ban lah ban pynphai iaki jaka na Block 1 kaba lah shah pynhap ne kynthup jubor da ki 70 tylli ki snem ha ka United Mikir bad North Cachar Hills District (Karbi Anglong mynta) hapoh ka jylla Assam.
Ula ong, ka seng naka por sha ka por ka don lang bad ki paradoh parasnam kiba shong ba sah sha Block 1 khamtam bad ka Elaka ka ba lah rim lah jah noh na ka hima Jaintia ka Labang Nangphyllut kaba shah pynhap jubor sha Mikir Hills lyngba ka hukum u Governor ka Assam 1951.
U samla Treibor u la ong ruh ba naduh ki por jong ki nongialam barim, ka seng ka ju buddien bha ia kane ka mat ingdawa na ka sorkar bad ka JSU ryngkat bad ki nongshong shnong ka Block 1 kiba lah shah ieh khunswet daka phew tylii ki snem sha Assam ki angnud shisha ia mynta ba kane ka jingpynbeit pud hapdeng ki artylli ki jylla khamtam ban ioh pynphai biang iaka Block 1 bad 2 sha ka jylla Meghalaya kan sei soh noh shi syndon ha kane ka jingiakren pynbeit pud.
U la ong ruh ba ka sorkar ka donkam ban pynphai biang (retransfer) iaka Block 1 bad kiwei ki jaka ka Khanduli bad Psiar sha ka jylla Meghalaya bad dei ban pynduh pyndam (repeal) iaka hukum lane Notification No.TAD/R/31/50/148 dated 13th April,1951.
