Pyniasoh ki nongialam ka UCPF lem bad 5 hajar ngut ki nongkyrshan ha Umsning
Nongpoh, Nailar 28: U President ka United Democratic Party (UDP) Bah Metbah Lyngdoh ula kren shai ba ka jingai ticket jong ka UDP sha ki kyrtong ban iakhun ia ka elekshon MLA 2023 kan shong eh ha ka rai jong ki nongkitkam bad ki nongkyrshan jong ka Constituency bapher bapher ka Jylla.
Une u Nongialam ka UDP ula kren ia kane ha ka jingialang pdiang burom ia ka jingwan pyniasoh ka kynhun Umsning Constituency Peoples Forum (UCLF) bad 5000 ngut ki nongkyrshan ha ka jingialang ba long hynnin ka sngi saitjain ha Umsning.
“Ka State Election Committee kan sa rai noh shen ban pynbna ia ki kyrteng jong ki kyrtong ban aireng ha ka elekshon MLA 2023. Hynrei ia ki ticket ia ki kyrteng kan shong eh hadien ka jingbishar bniah kat kum ka jingkyrshan ki paidbah” ong une u Nongialam ka UDP.
Lah ban kdew, ba ka kynhun UCPF ka dei ka kynhun kaba la lamkhmat da u Bah Sunshine Makri, u khun jong u Bah Nehlang Lyngdoh, MLA barim ka Umsning Konstituensi.
Kine ki Nongkitkam ka UCPF kiba la pyniasoh sha ka UDP kila tyrwa ia ka kyrteng u Bah Sunshine ban long u kyrtong ka UDP ha kane ka elekshon ban wan na Umsning Constituency. Kila kyrmen skhem ruh ba ka UDP kan ai ticket ia u Bah Sunshine uba don ka jingkyrmen ban ioh ia ka jingjop.
Ia kine ki Nongialam ka UCPF la pdiang sngewbha da u President ka UDP Bah Metbah Lyngdoh ha ka jingiadon ryngkat u General Secretary Bah Jemino Mawthoh, Bah Donbok Khymdeit President ka UDP Ri-Bhoi, Bah Pius Marweiñ MLA Ranikor, Balajied Kupar Synrem MLA ka Shella, ki nongkitkam jong ka party UDP naka jylla, ka district naduh ki longkmie.
U Bah Sunshine Makri, haba kren paidbah ha kane ka sngi ba la pdiang bad pynrung dkhot pura sha ka UDP, u la pynpaw ia ka jingkmen kaba khraw ba kum u nongialam ka UCPF u la lah ban pynhun ia ka jingangnud jong ki nongialam kiba la angnud ia u ban pyniasoh noh bad ka UDP bad ruh ban aireng ha ka ileksion MLA 2023 na ka tiket jong ka UDP.
“Hynrei ka rai halor ka tiket hi nga shaniah ha ki bor ba halor jong ka UDP kum ka party “ ula ong..
“Ngi la pyniasoh sha ka UDP namar ngi iohi ba kane ka party riewlum ka dei kawei na ki party kaba la nang ioh ia ka jingshaniah na u paidbah ka jylla”ula bynrap
Haba ai jingkren ha ka jingialang u President ka UDP Bah Metbah Lyngdoh ula pynpaw ia ka jingkmen kaba khraw ban sakhi ba da palat hajar ngut ki nongshong shnong ka Umsning Konstituensi ruh ki la phaikhmat sha ka party UDP ba kan ioh ban synshar ia ka jylla hadien ka ileksion MLA 2023.
“Kum ki dkot ka UDP ngi dei ban sngew trai ia la ka party bad ruh ban nang trei shitom ban pynkhlaiñ ia ka party UDP ha kane ka jingpynkhreh ban iakhun ia ka ileksion MLA ban wan” ula ong.
“Watla ngim shem la ioh jingjop ha u snem 2013, 2018 namar don bun ki jingbakla bad jingduna, hynrei u snem 2023 un dei u snem ban sah jingkynmaw na ka bynta ka party UDP namar kan sa long kawei ka party kaban sa khur bun tylli ki seat ha ka jylla namar ka jingnang kiew ka jingieid bad jingshaniah na u paidbah ka jylla hi baroh kawei”ula bynrap.
