Shillong, K’Lyngkot 28: Ka tnat Custom kala ioh ban kurup ia ki dawai Meth Tablets ba shongdor palat T. 12 klur bad kala pynjot ia ki dawai pynbuaid bad ki drok ba shongdor palat T.191.32 klur.
Haka kyrwoh ka Custom kala pyntip ba hadien bala ioh ia ki jingtip ba ki Ophisar ka HQ Preventive, Customs, NER, Shillong ha ryngkat ka CPF Silchar ki la bat ia 2 tylli ki Scooty ha Rangirkhari Point, Sonai-Silchar Road, Assam ha ka janmiet jong ka 26 tarik mynta u bnai.
La iathuh ba kitei ki Scooty ki dei kiba wan na Churachandpur, Manipur bad ki thmu iaid sha Silchar, Assam. Ha ka jingwad bniah, la lap ba 6 tylli ki pla ba la sop bad la buhrieh bha hapoh kawei pa kawei ka scooty.
Ia ki Meth Tablets ba rong jyrngam ba la lap hapoh la test da ka NDPS Field Test Kit kaba la pynshisha ia ka jingdon jong u drok Methamphetamine.
“Une u drok u khia 12 kg bad u shongdor ym duna T.12 klur bad la kem ia 2 ngut hapoh ka NDPS Act, 1985 bad la kurup ruh iaki kali. Ka jingtohkit kaba kham bniah halor kane ka kam ka dang iaid shakhmat”, la ong ki heh ka tnat Custom.
Ha kane ka taiew ba ladep, kum shi bynta jong ka Drug Destruction Drive, ka Commissionerate of Customs, NER, Shillong ka la pynduh ia ki drok ba la ioh kurup ha Shillong, Guwahati, Imphal, Dimapur bad Karimganj.
Ki jingioh kurup drok Heroin kala kot sha ka 15.90 kg, ki dawai Metamphetamine 92.776 kg, Cocaine 1567.161 kg, u Ganja ba shongdor haduh T.191.328 klur la pynduh jait noh.
Ka tnat Custom ka la shimkhia ban ïakhun pyrshah ïa baroh ki kam khaii beain bad ka jingshalan tuh ïa ki drok bad ki dawai pynbuaid, ka ksiar, ki sikret, ki tiar ba im khlaw, ki pisa thok jong ka India, ki kam thok ha ka kam khaii bad ka kam thok pisa katkum ka khaii pateng.
