Shillong, Kyllalyngkot 27: Ka Bengal kala pynrem ia ka Meghalaya da 9 wiket ha ka jingiakhun ha ka U-23 Men’s Col CK Nayudu Trophy 2024-25 kaba la long hynnin ka sngi ha Alotgre Ground, Tura.
Kane kadei ka sien kaba nyngkong eh ba ka BCCI kan pynlong ia kane ka jingialehkai ha Tura lyngba ka jingtrei shitom jong ka Tura District Cricket Association ia kaba kala ioh ia ka jingiaroh na baroh.
U Myntri Rangbah ka jylla u Conrad K Sangma ula leit ban peit ia kane ka jingialehkai katto katne por, ha ka sngi ka baar jong katei ka jingiakhun.
“Kane ka jingiakob kala long ka lynnong kaba kongsan ia ka rilum Garo bad kala plie lynti ban ai mynsiem shuh shuh ia kiwei pat ki nongialehkai Cricket” ong u Myntri Rangbah ha ka rynsan Social Media.
“Ka jingsngewnguh ka leit sha ka BCCI, CAB (Cricket Association of Bengal) bad MCA halor ka jingtrei shitom ka jongki bad ka jingbuh ia ki jingtei kiba kyrpang kaba la lah ban pynlong ia kane. To ngin ia lehkmen na ka bynta kane ka mawmer bad ban iaid shakhmat ban sakhi shuh shuh ia ki jingiakhun ha ki pateng ban dang wan”.
Ka Meghalaya kala kamai 133 run bad hap lut ki nongtied haka jingleit tied ha ka sien kaba nyngkong katba ka Bengla kala kamai 225 run bad kala tam da 92 run. Ka Meghalaya haba kala tied biang kala kamai tang 100 run bad ka Bengal kala donkam tang 9 run ban jop ia kane ka jingiakhun bad kala khur ia ka jingjop da kaba hap tang uwei u nongtied.
U Nongkawang bol ka Meghalaya u PM Santhosh, u Bipin Kr Ray bad u Manish Sharma kila ioh khur mar 3 wiket hynrei ka Megahalaya kala dun pat ha ka bynta jong ki nongtied ia kaba kim shym la lah ban kamai bun run bad dei tang u Swastic Chettri uba la kamai 48 run marwei haka jingleit tied ha ka sien ka baar bad ha ka jingleit tied ha ka sien kaba nyngkong ula kamai 26 run.
Ka Meghalaya kan iakhun khatduh eh bad ka Vidarbha ha Nagpur kaban sdang naduh ka 1 tarik u Rymphang.
