Shillong, Jan 24: Ka Rangdajied United FC kala jop da 6-0 ia ka Nongrim Hills SC ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo, hynne ka sngi Saitjain.
Hashwa kane ka jingialehkai, ka Nangkiew Irat SC kala iakhaid bad ka Langsning FC da 1-1.
Ha ka kylla step, ka Rangdajied kala thep 2 kol hapoh ka 10 minit lyngba u Owanijuh Pajuh ha ka 6 minit bad u Arlangky Nongsiej ha ka 9 minit bad kala nang pynjem khnap shuh shuh ia ka Nongrim Hills da kaba thep biang sa 2 kol ha ka minit kaba 26 lyngba u Dibormi Kassar bad u Owanijuh ha ka minit kaba 34.
Ha ka kylla miet, u Freddy B Jyrwa ula thep ia ka kol ha ka 68 minit bad u Manbhakupar Iawphniaw ula thep ia ka kol ha ka 77 minit uba lamareh naduh ka jaka lajong bad ula rah ia kane ka bol bad ula thep syndon iaka kol ia kaba u nongap kol ka Nongrim Hills ym shim la lah ban leh eiei.
Ka RUFC ha ka jingiakhun kaba la long ha ka 8 tarik u Naiwieng kala jop da 1-0 ia ka Nongrim Hills.
Ha ka jingiakhun hapdeng jongka Nangkiew Irat SC bad ka Langsning FC, u Rhitso Mero ula thep ia ka kol ha ka minit kaba 25 na ka bynta ka Langsning, katba u Jefferson Pakyntein ula thep ia ka kol naka bynta ka Nangkiew Irat ha ka minit kaba 90’+2 kaba la pyniakhaid syndon ia kane ka jingiakhun.
Kumban shu pynkynmaw, ha ka jingialehkai hapdeng kine ki artylli ki kynhun ha ka 29 tarik u Risaw 2024, ka Langsning kala shah pynrem da 3-1 ha ka Nangkiew Irat.
Ka jingiakhun jong ka OC Blue SPL 2024 ha ka sngi Baar kan long hapdeng ka Sawmer SC pyrshah ia ka Laitkor SC ha ka por 2:30 mynsngi. Ha ka jingiakhun ha ka sien kaba nyngkong, kaba la long ha ka 28 tarik u Risaw 2024, ka Laitkor kala jop da 2-0 ia ka Sawmer.
