Nongpoh, K’lyngkot 25 : Da ki spah ngut ki nongshongshnong ka thain Byrnihat, hynne ka sngi Saitjain kila mih paidbah ban pynpaw ia ka jingsngewkhia halor ka jingbym leh eiei ka Sorkar ban tehlakam ia ka jingpynmih lyer bih jong ki karkhana lyngba ki puipui kiba buh ia ka koit ka khiah ki paidbah ha ka jingma.
Ki paidbah na kylleng ki Shnong kila pynlong ia ka jingiaid paidbah naduh ka shnong Harlibagan haduh Dehalbagan ban pynpaw ia ka jingsngewkhia kaba jur ia ka jingbym lei eiei ka Meghalaya State Pollution Control Board (MSPCB) ban tehla kam ia ka jingpynmih tdem bad pui pui jong ki karkhana kaba la ktah ia ka lyer ring mynsiem ha ka thain.
Ia kane ka rally la lamkhmat da u Bah Phrangsngi Syngkli, Lyngdoh Raid ka Nongkylla ha ka jingiadonlang ruh da ki Rangbah Shnong na ki Shnong ka thaiñ Byrnihat lem bad ki spah ngut ki nongshong shnong.
Kumba la pynpaw da ki nongkren, ka jingsngewkhia ka long halor ka jingmynthi jong ki bor ka Sorkar jylla ban shimkhia ban weng mardor ia kane ka jingeh ba la mad da u paidbah wat hadien bala dep ban pynbna ruh ba ka thaiñ Byrnihat ka dei ka thain kaba jakhlia bha ka lyer namar ka jingdon bun tylli ki karkhana.
“Ka jingpynmih jong ki karkhana ia ki tdem bad pui pui ka la ktah shikatdei ia ki nongshong shnong, ki khynnah skul namar kane ka tdem iong ka la pynjakhlia ruh wat ia ki umbam Umdih bad pynjakhlia ruh ia ki iing ki sem. Donn ruh bun na ki nongshong shnong kiba la ngat ia ki jingpang kum ka Asthma, TB bad Cancer tang namar ba ring mynsiem ia ka tdem bad puipui iong kaba mih na ki karkhana”, pynpaw ki nongkren.
Ki la ong ruh ba na ka liang ki paidbah ki la dawa ba ka sorkar jylla kan shimkhia noh mardor ban weng ia kane ka jingeh u paidbah kem kumta kim banse ban shim da ki lad kiba tyngeh da kaba leit khang tala ia ki karkhana bapher bapher.
