Shillong, K’lyngkot 23: Ka Mawlai Town Dorbar ha ka sngi Palei, kala pynshai paidbah ba ka rai ban pynlong da ki ‘Common Platform’ ha ka jingialap elekshon MDC, ka dei kaba la shim ha ryngkat ka jingmynjur lang jong baroh ki kyrtong kiba la pynbna ban iakhun ia ka elekshon na Mawlai.
Kawei pat ka dei halor ka jingud jingnam jong ki Nongshongshnong (ki Kmie ki Kpa) namar ka elekshon kala wan jia ryngkhat ha ka por ba ki Khynnah Pule ki dang don hapdeng ka jingiakhun ne ialeh ia ki eksamin bapher bapher (MBoSE/NEHU).
Ka MTD ryngkat ki hynriew ngut ki kyrtong kiba la pynbna ban iakhun ia ka elekshon MDC na Mawlai, ha ka sngi Balang, kila iashim rai, ba kin pynlong noh ia ki jingialap elekshon tang da ki common platform, ki ban long ha manla ki shnong jong ka Mawlai Pyllun.
Kine ki 6 ngut ki kyrtong kiba la iadonlang ha ka jingshim rai ki kynthup ia u kyrtong ka VPP Eddie Kharumnuid, kyrtong ka Congress Bah Wanseng Jyrwa, kyrtong shimet-MDC ba mynta Bah Teibor Pathaw, MLA barim Bah PT Sawkmie, Bah Seibor L Nonglait bad ka kong D L Nonglait na ka BJP.
Haba pynbna ia kane ka rai hynne ka sngi, u President ka Mawlai Town Dorbar Bah Herlambok War ula ong “Ka jingshim ïa kane ka rai ban pynlong da ki Common Platform ha man la ki shnong ka dei kaba la mynjur lang da baroh ki kyrtong kiba la wan sha ka jingïalang” bad bynrap “ Ka jingshim ïa kane ka rai ka dei hadien ba ka Mawlai Town Dorbar ka la sngap ïa ka jingud jingnam ki kmie ki kpa bad ki nonghikai kiba la pynsngew ïa ka jingshah ktah ki khynnah pule namar ba ka jia ryngkhat ba ki samla pule ki hap ban thoh ïa ka eksamin”.
Lah ban kdew hangne, ka MBoSE kala pynbna ba ka eksamin Secondary School Leaving Certificate (SSLC) ne Matric kan sdang naduh ka 10 tarik u Rymphang katba ka eksam Higher Secondary School Leaving Certificate (HSSLC) ne klas XII kan sdang naduh ka 18 tarik Rymphang. Ka elekshon MDC kan long ha ak 21 tarik Rymphang.
Haba pynshai ia ki jingkynnoh ki Nongialam ka VPP pyrshah ia ka MTD ba ka khang pynlong ia ki Jingialang paidbah ne Public Meeting, u Bah Herlambok ula kyntait da kaba ong “Ka MTD kam lah satia ban khang bad kam don ain hi ruh ban khang hynrei ka dei ka jingai jingmut kaba la poi sha ka jingiasngewthuh jingmut lang lem bad ki Kyrtong kiban iakhun ia ka elekshon”.
U Bah Herlambok ula ong ba ha ka jingialang, ka MTD kala pynsngew ia ka jingai jingmut sha baroh ki kyrtong kiba wan sha ka jingialang haba iohi bad mad ia ki jingeh kiba mih ha ki elekshon bala dep khamtam lei ba ha kane ka kynti kan iatakhuh bad ki eksamin ki khynnah pule. Ula ong ba ki khynnah pule kin shah ktah jur na ka jingthnem ka jingialap elekshon khamtam haba la mih bun ngut ki kyrtong.
“Ka long kaba pynkyndit bad ka bym lah ban pdiang ba ha ki social media la kynnoh ba ka MTD ka khanglad ban ialap elekshon. Ngi khlem leh ia kata hynrei la leh haba pyrkhat lem ia ka jingbiang lang jong ki khynnah pule bad ki Nongshongshnong” ula pynpaw.
Haba batai shai shuh shuh ula ong ‘Lada baroh ki kyrtong kin leit sha man la ki shnong hala ki jong ki jong ki sngi, kan ktah shisha ia ki khynnah pule kiba hap ban pule kot bad pynleit jingmut ialade ha ka eksamin”.
Ula pyntip ba kat kum ka rai, ka Mawlai Town Dorbar hadien ba la ïahun bad mynjur lang, kan sa phah da ka jingthoh sha baroh ki kyrtong bad yn shim lypa ruh ïa ka jingpynbeit ban leit pan jingbit ban pynlong ïa ki Common Platform ha man la ki shnong ha kaba ka jingwan pynshai ki kyrtong kan long beit ha shnong bad ki nongshong shnong jong kata ka shnong kin wan ban Sngap ïa ki jingkren jong ki kyrtong.
