Nongpoh, K’lyngkot 22: Ki Nongialam Shnong ka shnong Shakoikuna, ha ka sngi Balang, kila leit ban ujor sha u Deputy Commissioner ka Ri-Bhoi District Abhilash Baranwal, halor ka jingkynnoh ba jah klep ka pisa ba kot T. 1 klur na ka skhim pynroi nongkyndong bala tip kum ka Rural Infrastructure Development Fund (RIDF) 2021-22 jong ka NABARD.
Kine ki Nongialam shnong hapoh ka jingialam u Bah Khil Mariang Asst Rangbah Shnong bad ki riew rangbah ka Shnong Bah Barnabas Maring bad Bah Gabriel Makri, kila kynnoh ruh ba ka don ka jingbamsap kaba jur na kane ka skhim kaba la mang hapoh ka shnong Shakoikuna.
Haba kren sha ki lad pathai khubor hadien ka jingiakynduh ia u Deputy Commissioner, kine ki rangbah kila pyntip ba kat kum ka RTI bala pan da uwei u rangbah na Shnong, la pynpaw ba ia katei ka skhim la dep ban pyllait pisa haduh T.1 klur ban pyntrei ia ki project bapher bapher ban kyntiew ia ka roi ka par hapoh ka Shnong hynrei sngewsih ban iohi ba kam don satia ka jingpyndonkam hok ia kane ka pisa kat kum ka jingthmu.
La kynnoh ba ki project kiba la pynpaw ha ki kot ki sla bala ioh na ka RTI, ki dei ruh kiba mih tang ha kine ki kot hynrei kim shym la don satia hapoh ka shnong.
Kine ki project ki kynthup ia ka CC Irrigation Weirs, CC Irrigation Canals, Water Harvesting Structures, Cmmand Area Protection Wall, RCC Aqueduct, Bench Terracing, Improvement of Existing Paddy Field, Drinking Water Tank, Approach Road sha ki jaka trei bad kiwei kiwei.
Kila kynnoh ba kat kum ka RTI, la lap ba ia ka pisa lah dep ban pyllait sha ki nongshongshnong kiba la mih kyrteng naduh u Nailar 2022 hynrei kine kiba mih kyrteng kim shym la ioh satia ia ka pisa bala pynmang kat kum ka kam. La lap ruh ba bun ki kyrteng kiba mih kim dei satia kiba na ka shnong Shakoikuna.
Kine ki Rangbah kila ai ruh ia ki kyrteng jong ki katto katne ngut ki briew kiba la paw kyrteng hynrei khlem ioh ia ka shim ban long kum ka sakhi ia kane ka kam. Kine ki dei ka Kong Elbina Makri, Bah Jer Maring, Bah Spil Maring bad Bah Jermel Makri.
Kine ki Rangbah kila kyntu ia u Deputy Commissioner ba un tuklar bad shimkhia ia kane ka kam da kaba phah tohkit ha ki Ophisar ba dei khmih khnang ba ka Ophis kan lap ia ka jingshisha bad kan pynshitom ruh ia ki briew kiba donkti.
 2021-22 jong ka NABARD.){kind=link}