Pyntip u CM ba dang iakren ka Jylla bad ka Sorkar Pdeng ban pyntreikam noh ia ka ILP

Ka ILP kan plie lynti ia ka jingwan ka lynti rel ha Ri-lum Khasi bad Jaintia

Shillong, K’lyngkot 15 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar jong u, ka dang iai buddien bad ka Sorkar Pdeng halor ka jingdonkam ban pynsted noh ia ka jingpyntreikam ia ka Inner Line Permit (ILP) namar kane kan weng ia kiba bun ki jingeh bad plie lynti ia ka jingwan jong ka lynti rel ha Ri-lum Khasi bad Jaintia.

Haba jubab ia ka jingkylli halor kane ka kam, u Conrad ula ong “Hooid, ka dei kaba shisha bad ngi dang iakren ia kane (Lada ka Meghalaya ka ioh ILP, kan weng ia ka jingeh ba iadei bad ka lynti rel) bad dei na kata ka daw ngi la mynjur ia ka Resolution halor ka ILP. Ka dei tang ka Sorkar jong ngi ba mynjur ia ka resolution hapoh Iingdorbar Thaw Ain bad kane ka dei ka khubor kaba sawa jam sha ka jingdawa kaba la don la bun snem”.

Hynrei ula iai ban ba ka bor ban ai ia ka ILP ka shong ha ka Sorkar Pdeng bad ong “Namar kata, ba ngin ong ba kan sa urlong ka long kaba eh bha, ngi lah ban tynruh ha ka kyrdan ka Sorkar Pdeng hynrei ka dei kaei kaei kaba ngam lah ban ai kano kano ka jingkular”.

Haba niew ia ka jingong ba ka jingpyntreikam ia ka ILP kan plie lynti ia ka jingwan ka lynti rel kum kaba “dei shisha”, u Myntri Rangbah ula ong “Ka mat jong phi ka dei kaba shongnia hynrei ka mat hi ka long ba ngi dang bteng ban iakren bad ka Sorkar India bad lada ngi lah ban shim ia kane kawei ka sienjam, kan plie lynti ia kiba bun ki kam ban lah pynbeit bad dei ruh ban mynjur noh”.

Haba ong ia kane, u Conrad ula ieng ha ka nongrim ba ka Sorkar kan pynthikna pat ba ka jingpyntreikam ia ka ILP kan nym ktah ia ka kam jngohkai pyrthei hapoh ka Jylla.

Ha kajuh ka por, u Myntri Rangbah u pyntip ba un sa iakynduh ia u Myntri lynti rel ha New Delhi lashisngi ban iakren halor ka jingiaid jong ka jingtyrwa ia ka lynti rel ha Ri-lum Khasi.

Ka project lynti rel ha Ri-lum Khasi kala iatakhuh diengpyngkiang namar ka jingpyrshah kaba jur na ki kynhun bapher bapher kynthup ki Sengbhalang ba don jingsyier ia ka jingrung kyrthep ki mynder. Kiba bun kila dawa ia ka Sorkar ban pyntreikam shuwa ia ka ILP hashuwa ban iakren ia ka project lynti rel hapoh ka thain.

U Conrad ula kular “Ngi la iai kren ha ki lad pathai khubor bad ha ki rynsan bapher bapher ba kano kano ka rai ka ban gin shim, kan long ha ryngkat ka jingkyrshan jong u paidbah ka thain ka Jylla bad ki Seng bapher bapher bad ngin pyrshang kat kaba lah ban pynbeit ia kine ki kam bad hadien kata ngin sa jam shakhmat bad ka kam lynti rel ha ka thain”.

Ula pyntip ruh ba ka Sorkar ka dang pynkhreh mynta ban ithuh ia kiwei pat ki lynti ban pynpoi lynti rel sha Ri-lum Jaintia bad Ri-lum Garo.

“Ngin sa iakren shuwa bad ki kynhun bapher bapher bad hadien kata ngin sa jam shakhmat bad ka jingithuh ia kiwei pat ki lynti ban pyniaid ia ka lynti rel kiba lah ban ai jingmyntoi ia ka Jylla bad ia ki paidbah bad ia ka ioh ka kot” ula ong.