Shillong, Kyllalyngkot 15: Ka Mawlai SC kala bteng ban khur ia ka jingjop ban bat ia ka kyrdan kaba nyngkong ha ka OC Blue Shillong Premier League 2024 da kaba pynrem da 2-1 ia ka Nongthymmai SC, hynne ka sngi Balang ha ka jingiakhun kaba la long ha SSA Stadium, First Ground, Polo.
U Romarius Laban ula thep ia ka kol ha ka minit kaba 31 bad u Brolington Warlarpih ula thep ia ka kol ha ka 66 minit lyngba ka Penalaty kaba la pynlong syndon iaka Mawlai ban ioh khur 3 point.
Katba u Rudolf Shadap ula thep ia ka kol ha ka 58 minit na ka bynta ka Nongthymmai.
Kane ka jingjop kala pynlong ia ka Mawlai ban long ka kynhun kaba la bteng ban shu khur ia ka jingjop khlem da shah rem haduh 8 sien jong ka jingialehkai bad kala kamai mynta 22 point .
Ka Nongthymmai kala don ha ka kyrdan kaba ka lah ban shah pynhiar kyrdan noh na ka jingkamai tang 7 point kaba iaryngkat bad ka Langsning FC hynrei kaba la tam pat ia ka Nongthymmai ha ka jingioh thep bun kol.
U Reformer Pale, ula ioh mih naduh kaba sdang ia ka Mawlai ula ioh ia ka kabu ban thep kol hynrei ia katei ka bol kaba la shut jam bha la ioh ban iada da u nongapkol ka Nongthymmai u Akash Thapa. Une u nongapkol ula bteng biang ban pyni ia ka sap ka jongu da kaba iada ia ka bol ban ioh rung shapoh kol kaba la shut najan bha da u Mark Gareth Shabong.
Hadien ba ka Mawlai kala thep ia ka kol ha ka kylla step, ka Nongthymmai kala ioh ban pyniakhiad ha ka minit kaba 58 ha kaba u Rudolf ym shim la pynlehnohei ban thep ia ka kol ia kaba u nongapkol ka Mawlai u Lambhamiki Lamare ym shim la lah shuh ban iada ia ka bol.
Hadien kane, ka Mawlai kala ioh ia ka Penalty bad khlem kano kano ka jingartatien u Brolington ula thep ia ka kol kaba la pynlong syndon ia ka Mawlai ban khur ia ka jingjop.
Ka jingiakhun haka sngi Thohdieng kan long hapdeng ka Langsning pyrshah ia ka Rangdajied United FC ha ka por 2:30 mynsngi.
