Shillong, Kyllalyngkot 11: U MLA ka BJP na South Shillong u Bah Sanbor Shullai hynne ka sngi Saitjain, ula buh ia u mawnongrim ban sdang shna noh iaka madan Artificial Turf kaba kot T.5 Klur tam ha ka madan ialehkai kaba don ha ka shnong Madan Laban.
Haba kren ha ka jingialang u Bah Sanbor ula ai khublei ia u Myntri Rangbah ka jylla u Conrad K Sangma bad ia u Myntri ka tnad Sports nad Youth Affairs u Bah Shakliar Warjri kiba la bhah kyrpang ban shna iaka madan football Artificial Turf ha Madan Laban kaba kot T.5,26,35000 kaban kynthup lang ia ka jingshna iaka jingker, ki kynroh, ki nala, ki jaka shongthait, jaka bujli jain ki nongialehkai bad ka ophis treikam.
Ula ong ba ka jingshna ia kane ka madan kan iarap ruh ha kaban kyntiew iaka sap ka phong jong ki nongialehkai (Athletes) ha kaba kin ioh ruh ia ka jinghikai pyntbit.
U Bah Sanbor ula ong, shisien ba la dep ban shna ia kane ka madan yn sa aiti ha ka dorbar shnong, Madan Laban Sports Club, Seng Kynthei bad ka Seng Samla ha kaba yn sa iasoi ia ka jingiatehkular na ka bynta ban pyniaid bad ban sumar ia kane ka madan ialehkai.
Ula ong ba kane ka madan baroh shi katta kala kylla long kum ka jaka ban dih ia ki jingdih kiba sniew bad ban leh ia ki kam bymman hynrei mynta ynda lah dep shna kan long beit thik tang naka bynta ban ialehkai bad ula kyntu ba ym dei ban shah ban pynlong ia kino kino ki tamasa ha kane ka madan ialehkai ynda la dep ban shna pura ia ka.
Ha kane ka jingplie ia u mawnongrim la iadonlang u Rangbah Shnong ka Madan Laban u Bah Ios Sun, u Secretary u Bah RG Marbaniang, ki heh ophisar na ka tnad Sports bad Youth Affairs bad na ka State Sports Council bad ki paid nongshong shnong.
